Ki 5 ngut kiwa man kam ki National Cadet Corps (NCC) ka Wapung Higher Secondary School da chah jied ki wow chimbynta ha ka National Camp kawa daw man ha Itanagar, Arunachal Pradesh kawa daw sdang nadooh ka 3 tarik uni bnai hadooh ka 15 tarik iwa man 12 sngi.
Kini ki 5 ngut toh u Merous Dkhar, u Mechantre Ryngkhlem, u Kelmi Siangshai, u Stephan Phawa waka Begiveme Siangshai.
Chwa wow mih ki yow lai cha kani ka National Camp da em ka yachem lang heiwa u waheh chnong yong ka chnong Wapungskur, u Deolangki Dkhar da ong u ka chnong katwa ye da yaleh ko wow pynku ya ka skur ha waroh ki liang wei da kyntu kympham u leh ya kini ki khynnah wow nang man ki kiwa kreh chitom hei im yong ki yow yoh ki yei jop ha ki kaam wa kwah ki u leh.
Da sneiñ u leh ya ki wow man ki kiwa tieñ wei burom ya ki waheh khamtam ya kiwa sikai wei wow man ki khynnah wa em salon.
Neiliang u Secretary yong ka School Managing Committee, u Gratefulson Siangshai hawa e yei klam da pynsñiaw u yei sarong neibhah kani ka skur toh kawa dang thymme wow em NCC wei da man ki leh kiwa chimkhia yei kaam ki, kamtæ da e khublei u ya u CTO yong ka NCC ha kani ka skur wow nang kreh chitom u wow pynku ya ki khynnah wei ini da man ko ka laad wow sdang ya ki khynnah yow yoh sikai ki boon jait hei wow e yada wei toh u kreh chitom ki wow pynlut yei bor i sor wei wym toh leh u mylliñ ki ya ka puræ puthi yong ki.
Neiliang u CTO, u Pynshemi Siangshai leh ong u wa dap u dei kmen wei sñiawsuk wow hikai ya ki khynnah ha kani ka skur neibhah wa man ki kiwa kitkhlieh sakhiat wei chimkhia ya waroh iwa da hikai u ya ki wei da pyn-eh-daw u ya ki yow poi thaw ki dei suk.
Discussion about this post