Na kiwa jop ya ka Election Lok Sabha 2024 wa da pynbna ynnin, da chah jied MP leh ki soo ngut kiwa dang 25 snem i rta wow man ki kam kiwa khian rta dooh ki MP ka Lok Sabha ha kani ka kynti wei kini kynthup ki ya u Pushpendra Saroj, ka Priya Saroj, ka Shambhavi Choudhary wa ka Sanjana Jatav.
U Pushpendra Saroj wa ka Priya Saroj da yakhun ki na ka Samajwadi Party (SP), ka Shambhavi Choudhary na ka Lok Janshakti Party (LJP) katwa ka Sanjana Jatav na ka Congress.
U Pushpendra Saroj yong ka Samajwadi Party (SP) da jop u na Kaushambi ka jylla Uttar Pradesh deiwa pynrem ya u MP ka BJP, u Vinod Kumar Sonkar da 1,03,944 Vote. U Pushpendra man u leh kam u khon u Inderjit Saroj uwa da man kam u MLA wa la san sien kamjooh u Montri sorkar jylla ka UP.
Ka Priya Saroj da yakhun ko na ka SP hi na Machhlishahr ka jylla Uttar Pradesh wei da pynrem ko ya u MP ka BJP, u Bholanath da 35,850. U pa ko uwa tip kam u Toofani Saroj toh uwa da dep man MP la le sien.
Ka Shambhavi Choudhary da yakhun u ko na ka LJP na Samastipur Constituency ka jylla Bihar wei da pynrem ko ya u kyrtong ka Congress, u Sunny Hazari da palat chi lak Vote. U papun ka Shambhavi toh u Mahavir Choudhary wei jooh man u kam u dkhot ka Congress kamjooh leh u Montri ka sorkar jylla heipor wa ka Congress jooh synchaar ko ha Bihar. U pa won ko toh u Ashok Choudhary uwa jooh man kam u Montri hapoh ka sorkar u Nitesh Kumar ha Bihar.
Ka Sanjana Jatav da yakhun ko naka Congress ha Bharatpur ka jylla Rajasthan deiwa pynrem ya u kyrtong ka BJP, u Ramswaroop Koli da 51,983 Vote. Da dep yaleh MLA ko leh ynnin u snem tangwa da rem ko ha u Ramesh Khedi uwa man u kyrtong ka BJP da 409 Vote.
Discussion about this post