U khynroo na Jowai uwa tip kam u Lalrinzuala Thieite (26 snem), ynnin ka sngi da chah jied u wow mihkhmat yaka Meghalaya haka yakob Man of the World, India 2024 kawa daw pynman ha ka tyaaw wa ar u bnai wow wan ha Pune, Maharashtra.
Kiwa jop ya kani dow yoh ki u mihkhmat yaka India haka Man of the World.
Ynnin u snem ha u Kmaichonglad (Dec) da yoh rah leh yaka Mr. Attitude King India International 2023. Da dep yoh u leh yei naam Mr. Iconic Face of Northeast 2022, Mr. Northeast Superstar 2021, Mr. Fashion Assam wei da jop u leh yaka Rising Star of Assam 2022.
Da jooh lai bichaar u leh ya kiwa boon ki yakob hapoh Ri-loom Jaiñtia kam ha ka Miss Kupli, Miss Borghat, Miss Latyrke, Miss Byndihati, Miss Myntang, Miss Amlarem, Inter College Traditional Attire Competition, ka Audition yong ka Face of Meghalaya wa kiwi kiwi.
Da man u leh uwa sdang yaka One Step-Up Jaintia Model ha Jowai khnang yow pynku ya ki khynnah khynnroo kiwa em sap ha ki kaam Modelling.
Da ong u kiwa em sap wow man kam ki Model boonsien duna bha wa yarap ki wa kiwa yahluti ki, kamtæ da seiñ u da kani ka One Step-Up Jaintia Model khnang yow yoh rynsan kiwa boon ki Model heiwa da lai yah ki wow pynyoo yei sap yong ki ha kiwa boon ki Fete wa da pynman ha kylleiñ ka Ri-loom Jaiñtia.
Discussion about this post