U Dippu Ch Sangma wa u Kishan Lyngdoh da chah jied ki kam chibynta kiwa yalehke ka dhab ka North East Zone kiwa daw chibynta hei sien nyngkong ha ka Duleep Trophy.
U Chiang D Shira uwa na Meghalaya daw man u leh kam ka Manager kani ka dhab.
U Dippu toh uwa da dep yalehke 45 tylli ki yalehke ya ka Meghalaya ha ki lympung wa da pynman da ka BCCI wei da dep u leh wow yoh ya ka chi spah Run ha ka Ranji Trophy wa ar tylli ki 50 Run heiwa kawi toh ha ka Ranji Trophy wa kawi won ha ka Vijay Hazare Trophy. Da dep u leh wow yoh 40 tylli ki Wicket kiwa kynthup lang ha ka T20 Syed Mushtaq Ali Trophy.
U Kishan uwa na East Jaiñtia Hills won toh uwa da em hapoh kiwa yalehke ka Meghalaya ym pu em slem heiwa da lehbha u ha ka Syed Mushtaq Ali Trophy ha u 2021, deiwa kamai 247 Run ha ki 5 tylli ki Innings deiwa yoh 3 tylli ki 50 Run deiwa yoh ya ka Strike Rate kawa dajan poi 143.
Ka Duleep Trophy toh ka First Class Knockout Tournament deiwa yabhah ya kiwa yalehke ha ki Zone heiwa ka Assam wa ka Tripura da em ki hapoh ka East Zone.
Waroh 15 ngut kiwa yalehke ka dhab North East Zone toh kiwa na ka thaaiñ mihsngi khlem em ki Guest Player, wei daw yachem ki waka West Zone nadooh ka 8 tarik u Naikhynde.
Kiwa yalehke ka North East Zone: Techi Neri, Techi Doria (Arunachal Pradesh), Bishworjit Singh Konthoujam, Rajkumar Rex Singh, L Kishan Singha, Md Al Bashid (Manipur), Kishan Lyngdoh, Dippu Ch Sangma (Meghalaya), G Lalbiakvela, Bobby Zothansanga (Mizoram), Jonathan Rongsen, Khrievitso Kense, Hokaito Zhimomi (Nagaland), Ashish Thapa wa u Ankur Malik (Sikkim).
