Ka mukotduma heiyatoh wa ka krem Mawjymbuin wa em ha Mawsynram kawa da yaleh da ka Yatra da chong bichaar biang ka ynnin da u Justice H.S. Thangkhiew, Judge ka Meghalaya High Court.
Ha kani ka sngi da pynyoo ya ka chithi wa da e bor wow lai pynman Yatra na Mahadev Khola, Shillong cha Mawsynram wa da soi da ka DC ka East Khasi Hills ha ka 10 tarik uni u bnai.
Neiliang ka Dorbar Chnong Mawsynram da ong ko lada toh du i lai Pilgrim ym em pyrchah ki wow pynman ya kani ka Yatra tangwa ym chah wow leh Puja, u wanrah kiwi kiwon ki tiar wow leh niam kam ki dhup, ki syntu wa kiwi kiwi.
U muktiar kiwa yaleh mukotduma da ong u wa kani ka Yatra u man ko du kam ka Pilgrimage wei daw kynjrait um donhi ki ha u moo wa em hapoh ka krem tangwa yeini ym em da mynjur da u waheh chnong.
Kamtæ ka yung bichaar da ong ko wa kani ka Yatra ye ko wow lai chakhmat deiwa bood ya ki kyndon wa da e ka DC deiwa ban joor ka High Court wym toh wow pyntngit, u pynthut yei lai i wan ki kari.
Da phah leh ya kini kiwa pynman Yatra wow booh da ki bru Private Security næ ki Volunteer ki wow pynlai ya ki kari kam ki Traffic Warden ha ka sngi wa pynman ya kani ka lai Yatra.
Neidaw won wa pyrchah ka chong yei theh um ha u moo wa em hapoh ka krem, ka yung bichaar u chah ko wow kynjrait um donhi ymtoh deiwa theh um, wei ka tarik wow leh ya kani ka Yatra ye wow ya pynbait da kiwa embynta wei wow pyntip cha ki bor District.
Ka yung bichaar da ban joor ko leh yei emkaam wow pynkrehkaam ya ka aiñ yow lait i thut wei toh u man i kitkhlieh ka jylla.
Discussion about this post