Ka Meghalaya High Court ynne da pynmih hukum ko wow phah pyndam yaka kyndon aiñ sorkar Meghalaya wow khang ya kiwa sikai ha ki College wa yoh yarap naka sorkar namo ki Government Aided College wow ksohkaam ki hapoh ki seiñ saiñhima namo ki Political Organisation.
Ha kani ka mukotduma wa da yaleh da u Brightstarwell Marbaniang deilang wa kiwi da dawa wow pyndam ya kani ka hukum sorkar yow ye ki wow chimbynta ha ki kaam Politics kamjooh wow chimbynta ha ki Election.
Kiwa yaleh mukotduma da ong ki wa kani ka hukum da knieh ko yei hok yong ki heiwa ka sorkar hapoh ka Meghalaya State Education Policy wa pynmih haka 26-08-2018 ha i bynta ka Clause-7.4.3, da khang ko ya kiwa sikai College wa kiwa sikai ha ki University wow chimbynta ha ki kaam saiñhima wei wow man dkhot ha ki seiñ saiñhima.
Da e nia wa waroh toh kiwa em hok wow chimbynta ha ki Election katkam ka Section 5 ka Chapter II ka The Representation of the People Act, 1951 kawa klam heiyatoh i hok wow yaleh Election MLA.
Da ong leh wa ki Assistant Professor, kiwa sikai wa kiwa kreh ha ki thaw puræ wa yoh yarap naka sorkar ym kheiñ yei kaam ki kam ki “Office of Profit” neibhah ini da kheiñ du ya kitu kiwa kreh sorkar jylla waka sorkar pyrdi heiwa da em leh ki mukotduma wa pynyoo wa kiwa kreh ha kam kini ki thaw wa yoh yarap naka sorkar ym kheiñ ya ki kam kiwa kreh sorkar.
Ka High Court hawa pait leh ya kiwi ki mukotduma kiwa sariem wa kini wei deiwa pait leh yaka hukum ka sorkar wa da pynmih ko haka 23-03-21 hapoh ka Clause 7.4.3 ka Meghlaya Education Policy 2018 wow khang ya kiwa sikai ha ki College wa yoh yarap naka sorkar wow man dkhot ki ha ki seiñ saiñhima heiwa ka sorkar da ong ko wa ya ini da leh yow lait i thut i kaam kiwa sikai, neiliang ka yung bichaar da pynmih ko yaka hukum kawa yachah ya kiwa yaleh mukotduma deiwa pyndam ya kani ka kyndon wa da pynkrehkaam ka sorkar haka 23-03-21 iwa mut wa kiwa sikai ha ki College wa kyrchaan da ka sorkar ym ye wow khang ya ki wow chimbynta ki ha ki kaam saiñhima.
