Hadien wa ka khlam COVID-19 dang poor ko kat dang mih ki sngi ha ka jylla heiwa kiwa khlaad na kani ka khlam leh dang boon ki, neiliang ka Seiñraij Jowai da rai ko wow chah u pyndep ya ka niam wa khaddooh yong kiwa khlaad na uni u khñiang ha ka Khnap Thang-bru.
Hawa yaklam wa u Secretary ka Seiñraij Jowai, u Arwotki Sumer da ong u wa ynne da yachem wa u Deputy Commissioner ka West Jaiñtia Hills District heiwa neiliang ka seiñ da rai ko wow tyrwa wow pynemkaam ya ka Khnap Thang-bru ha Pohhali, Dulong neibynta wow pyndep ya ka niam wa khaddooh yong kiwa khlaad na u COVID-19 khlem kheiñ ya kawon kawon ka niam.
Da ong u wa ya ini da leh ka Seiñraij dei mynsien wow yarap para bru wei ym em ko iwon iwon i wit i thut lada pyndep ya ka niam wa khaddooh ha kani ka Khnap Thang-bru.
Heijooh i por da kyntu u ya ki tre yung wow pyntip cha ki bor ka District wa ka Seiñraij Jowai khnang wow ye ki wow leh yeiwa emkaam.
Da ong u leh wa ka ki tre yung hawa pynemkaam ki ya ka Khnap Thang-bru emkaam wow pynbiang ki ya ki PPE neibynta ki Tymmen Thang-bru wa kiwi kiwi ki emkaam.
Kam wow pynkynmoo heini, neiliang ka Seiñraij Jowai ha u snem wa dadep da tyrwa ko ya ki bru wow pynemkaam ya ka Khnap Thang-bru lada em kiwa khlaad na kani ka kjut khlam.
Da pyntip u leh wa ka Khnap Thang-bru ka wow pynemkaam hei wow pyndep ya ka niam wa khaddooh ya kiwa khlaad na u COVID-19 toh kawa em ha Pohhali Dulong, Jowai.
