Shillong: Ka sorkar jylla ynne ka sngi da chim ko ya ka rai wow chah ya ki khynnah nadooh Class VI, VII wa VIII wow lai ki cha ki skur nadooh ka 15 tarik uni u bnai, wei i lai yong ki khynnah cha ki skur toh neibynta wow paan yarap na kiwa sikai da i tip yong ki bei ki pa.
Hawa klam ynne ka sngi, u Montri wa pait yaka chnat puræ puthi ha ka jylla, u Lahkmen Rymbui da ong u wa ka sorkar hadien wa da bichaar ko yei pynbna na ka Ministry of Home Affairs (MHA) katkam ka Unlock 5.0 wow ekti ha ki sorkar jylla neibynta wow wai biang ya ki thaw puræ hadien ka 15 tarik, ka sorkar ynne ka sngi da chim ko ya ka rai wow chah chwa du ya ki khynnah Upper Primary du neibynta wow paan yarap na kiwa sikai wei wow tip ya ki lynnong (Syllabus) wow pynkhreh.
Ha i jooh i por da pyntip u wa ka sorkar da phah ko ya u Director of School Education wow ya syllok lang ya waroh deiwa pyntip leh wa ya ini i kaam da e bor leh ha ki Sub Divisional School Education Officer (SDSEO) wow ya syllok lang wa ki bor pynlai skur kammon ki laad wow wai biang ya ki skur, heiwa daw hap ki wow pyntip noh cha ka sorkar ha ka 13 tarik uni u bnai yow bichaar lada hoi næ ym hoi u wai bait ya i hikai lyngba ki kamra Class.
