Ka jylla Manipur kawa man kam kawi na ki 5 tylli ki jylla wa daw pynman Election MLA ha uni u bnai wa daw wan heiwa ka sngi thap Vote u pynman ha ka 27-02-22 katwa i niaw Vote won ha ka 10-03-22. Pyn ynne ka sngi da sakhi ko ya ki kaam chongchit Election heiwa da em ki bru wym tipmit wa kawang bomb ha i yung yong u kyrtong uwa da thmu wow yaleh na ka Congress.
Ini da jia i heipor step synyaw ynne ka 12 tarik heiwa da em ki bru wym tipmit kiwa da kawang Bomb ha ka Gate i yung u Salam Joy wa em hajan ka Chaprou Petrol Pump wa dang haap hapoh ka Wangoi Police Station, Imphal West.
Hajrong ini wa jia, neiliang u Joy da ong u wa lada em wa kwah wow pynyap, toh u pynyap ki oo ym toh u pynmynsoo ya kiwi ki bru ka Wangoi Assembly Constituency.
Ym pu em wa bahkhlieh ya ini i kaam tangwa da em hadooh 4 tylli ki sieñ kiwa da dawa na oo lyngba u WhatsApp ha u Khonchonglad (Nov) 2021 tangwa da ong u wa ini wa jia katni ym toh wa leh da ki sieñ kieñ suloi lane wa yatoh wa ki kaam saiñhima neibhah da rem Election u la le sien hadien wa jop u ha u 2007 wei katni ym em man u u bru wa pahooh wa mahajon.
Da ong u leh kitu ki wym em kyrchaan ya oo da pynpoor khubor ki wa u Salam Joy ym em poisa de u wow yaleh Election wei ki seiñ kieñ suloi leh tip ki yeini wei da suba u wa ya ini da leh da ki damok wa phah da kiwon ræ kiwon.
Da pynsñiaw u leh yei sñiawsih wa ini da jia i du hadien wa em arngut kiwa chah siat yap ki ha ki bru wa kieñ tiar yaleh hapoh ka Wangoi Assembly Constituency iwa da jia ha ka 9 tarik ha Samurou.
Kamtæ da kyrpaad u wym toh u pynman thaw yaleh thma ya ka Samurou.
