Kawi ka truck kawa lai luti lyngba yong u sarok Rymbai Bataw Borghat Jelalpur (RBBJ) kawa em ya u number AS 01 FC 7358 wa yah da u Meking Siangshai da chah kawang moo ko ynnin i miet ka 5 tarik heipor kamwa 10 waje i miet ha ki damok ha Lad Bataw.
U Meki Siangshai heipor wa liwan u hadien wa dep likhih likhan u deilang wa u Omega Sumer uwa man leh kam u Organizing Secretary yong ka seiñ FKJGP-SEBA Circle deiwi thmu u lai liwan cha yung khon yong oo ha Bataw, manda poi u ha laad wow lai cha chnong Bataw, da em i kawang moo syndet syndet na jrong loom heiwa kini arngut da lait salit ki nei thmu pynmynsoo yong ki damok.
Heiyatoh wa ini i jia, neiliang u Omega Sumer da pyntip u cha u waheh chnong ka Bataw heiwa u waheh chnong ka Bataw u Bhalang Suchiang da kubur u wa em hi i pynthut yei lai yei wan yong ki paidbah wa lai luti lyngba yong uni u sarok heiwa neiliang ka dorbar chnong Bataw da maham joor ko ya ki khon ka chnong wa leh ya kiwon kiwon ki kaam wow pynbudnaam ya ka chnong.
Kamtæ neiliang yong u Deihok Sumer uwa man kam u President ka FKJGP-Bataw Unit uwa man leh kam u General Secretary yong ka FKJGP-East Jaintia Hills District Khliehriat mar sien yoh yutip hajrong ini i jia da wan u wow lai li pait tangwa ym em chem ya kiwa emkti ha ini i kaam kiwa da yut.
Neiliang ka seiñ FKJGP-Bataw Unit da beiñ joor ko hajrong ini i jia wei da dawa joor ko ya ka sorkar lyngba ka Police Department wow chimkhia u takit deiwa kdong ya kiwa emkti wei wow pynchitom ya kini ki damok katkam ka aiñ. Heiyatoh wa ini i jia da booh ya i ujor cha thanat Ladrymbai Outpost wow booddien ya ini i jia.
