I long i man ha nongbah Shillong da sdang wow chah ktah hadien i chah siat ki 5 ngut kiwa chong chnong ka Mukroh ha ki pulit ka Assam hei step ka 22 tarik deilang wa uwi u Forest Guard. Neidaw ini i jia, ki 5 tylli ki seiñbahalang ynne i janmiet ka 24 tarik da pynman ki yaka yalang sñiawlem wa i thang mombati hakhmat u mot yong u Kiang Nangbah ha Shillong uwa em hajan ka Civil Hospital.
Ka yalang yong ki 5 seiñ wa kynthup yaka KSU, FKJGP, JSU, HNYF wa RBYF da lai bait, tangwa hadien wa da wai kani ka yalang hanla kiwa yahkhmat ki seiñbhalang da kyntu ki ya waroh kiwa poi cha ka yalang wow man ki kiwa jai-jai, tangwa da em won ki kattu katni ngut kiwa da sdang wow pynmih kulmar deiwa kawang moo cha ki thaw wa em ki pulit.
Neiliang ki pulit wa ki bor pynlai District nadooh chwa wow kut ka yalang thang mombati da khang lut ki ya ki kari wow lai cha ka thaaiñ Civil Hospital nadooh Barik Point.
Da ini i khang ya ki kari, ka sarok na Barik chadooh Civil ter da langam kiaw wei doom ngiaw wei da yoo leh ya ki kattu katni kiwa da pyrchang wow kawang moo.
Hadien ini da em won kiwa kawang Petrol Bomb heiwa da toh uwi u pulit wei da kit ya oo cha Hospital wei da iñ leh kawi ka Mini Bus paidbah hajan ka thaaiñ IGP-Civil Hospital wa thaaiñ Barik Point kawa da tyrrah leh cha luti lai kjat.
Neiliang ka seiñ HITO da pynbna ko leh yaka Red Flag Day haka 26 tarik wei daw thang leh ya ki dur bula u Conrad Sangma wa u Himanta Biswa Sarma heiwa daw pynman leh yei lai paidbah na Madan Ïewrynghep, Laitumkhrah heipor 3 waje i sngi deiwa lai cha Dhankheti wei daw pynman leh yei thang mombati kam ka dak sñiawlem ya ki mynsiem wa da khlaad ha Mukroh nei siat ki pulit ka Assam haka 22 tarik uni u bnai.
