Ynne i step, ki BSF Meghalaya deiwa ya krehlang wa ki pulit da yoh ki wow kem ya 7 ngut ki Bangladeshi ha khappood ha ki bynta ka le laad ka Baldamgiri Tinali, South West Garo Hills District.
Kini kiwa chah kem toh u Amir Ali (35 snem), u Mir Jahan (45 snem), u Biplob Mia (35 snem), u Angur Hussain (20 snem), u Chand Mia (32 snem), u Rasel Mia (32 snem) wa u MD Bakul Mia (35 snem) kiwa waroh na Kurigram District, Bangladesh.
Ya kini da yoh wow kem da ki 50th Bn BSF Meghalaya deilang wa ki pulit ka South West Garo Hills hadien wa tip wa da rieh ki hajan ka Baldamgiri Tinali wei hawa takit ya ki da khana ki wa mut ki wow lai cha Assam yoh thooh kreh. Na ki da yoh ya ki Passport Bangladesh, poisa Bangladesh, ki Mobile Phone wa ki SIM Card.
Ha iwi won i jia, ki 4th Bn BSF Meghalaya da yoh ki wow kem 4 ngut ki Bangladeshi deilang wa le ngut kiwa na India. Ki Bangladeshi toh u Shorobindu Biswas (37 snem), u Royal Talukdar (17 snem), ka Kausalla Talukdar (33 snem) wa u Rony Biswas (34 snem) uwa man leh kam uwa yahluti ya kini. Ki nong India won toh u Shankhor Saha (46 snem), u Ronbir Saha (9 snem) wa u Suna Lyngdoh (22 snem) wei da kem leh ya ka kari wa wan ki ha Dawki.
Kini kiwa na Bangladesh hawa takit da ong ki wa mut ki wow lai cha Assam yow thooh kreh katwa ki le ngut kiwa na India won toh kiwa dadep psiah cha Bangladesh yow lai yachem wa kiwa emyatoh ki wei ya ka kari da pynbiang da u Rony neibynta kini waroh.
Discussion about this post