U Superintendent of Police (City), Shillong da pyntip u wa ha ka 6 tarik uni u bnai da yoh wow kem ya 3 ngut ki bru kiwa lute wei rah yabor ya kiwa khayi jhoor.
Kini ki bru wa chah kem toh kiwa kam ya idæ kam kiwa dai jhoor wei da phon ki ya kiwa yah Truck cha rood deiwa tyrwa wow dai jhoor hei dor wa duna wei hadien wa kiwa yah Truck pyntip ki cha ki tre kiwa da mynjur wow thied ya ki jhoor ha ini i dor wa duna, da yah ki ya kini kiwa yah Truck cha i thaw wa em hadien ka ISBT næ chajan Umiam deiwa ong wa booh ki ya ki jhoor ha kini ki thaw.
Manda poi ha kini ki thaw wa langam, kini ki bru da rah yabor ki ya kiwa yah Truck deiwa pynbor ya ki wow pyntip cha ki tre wa da dep kit ya ki jhoor wei wow phah poisa ha ka Google Pay kini ki bru.
Kamtæ ki pulit ka Special Cell East Khasi Hills deiwa ya krehlang waka Meghalaya Traders Fresh Vegetable & Ginger Association deilang waka Khasi Jaiñtia Fresh Vegetable Suppliers Association ha ka 6 tarik da yoh ki wow kem ya 3 ngut ki bru na Mawlai Bypass hadien wa rah yabor ki ya uwa yah Truck na Lad Smit deiwa pynbor ya oo wow Phone cha ki tre yow su yaka poisa.
Da chem wa kini ki bru da leh ki ya ini i jooh i buit da boonsien wei da yoh leh ya ki FIR.
Ki pulit dang thooh ki leh ya kiwi de kiwa emkti ha ini i kaam wei deilang wa kini ki 3 ngut da yoh leh wow kem ya soo tylli ki Mobile Phone wa kawi ka kari Maruti Swift Dzire wei da suba leh wa kini ye ki wow emkti ha kiwi de ki kaam pyrchah aiñ.
Ya kini da pynngat Case haka Madanrting Police Station deiwa pyntoh haka Section 419/420/511/364A/384/34 ka IPC wei ka takit dang lai ko chakhmat.
Discussion about this post