Jowai : Ha ka step yong ka 27 tarik uni u bnai hei por kamwa 3 waje ki pulit yong ka Umtyra Infiltration, East Jaintia Hills hapoh i yahkhmat u OC ka khliehriat u ma D. Nongsiej da yoh kem ki 7 ngut ki nong Bangladesh kiwa wan psiah tooh chapoh ka Ri India da i thmu wow wan khayi pateiñ næ u kreh mylla hapoh ka jylla Meghalaya.
Katam ka khubor wa tikna da ong wa da yoh u kem ya kitai ki 7 ngut psiah tooh cha India lyngba ka chnong Sonapur kawa em ha khapood ka India wa ka Bangladesh, neitæ won kini ki nong Bangla da lai ki ter ter hadooh wa poi ki ha ka chnong Kuliang East Jaintia Hills na Kuliang won da thmu ki u wan cha Khliehriat, tangwa da i wym poi pyrkhat ki pulit yong ka Umtyra-Infiltration da yoh kem noh ki ya kini ki bru na kawi ka sumo ha Umtyra Check Point hei por 3 waje istep.
Ki khubor wa yoh da ong chooh chooh wa kini ki 7 ngut ki wa wan psiah tooh da ong ki wa i wan ku ki cha Ri-loom Jaintia toh na i daw wa kwah ki u thooh kreh nongsngi niebhah wa dooh kreh ware ki ha Bangladesh. Ki pulit da chem ki leh wa kini ki 7 ngut ym em ki kot ki sla ki da kiwa biang.
Ya kini ki 7 ngut ki nong Bangladesh da tip pyrtuid kam u Md.Bilal Ahamed 30 snem uwa na ka chnong Ghalinagar, PS Kamaighah District Sylhet Bangladesh, u Md.Sahil Ahmed 25 snem uwa na Jeapur PS Jagiganj, District Sylhet, u Md Nazir Ahmed,30 snem Jeapur PS Tagigauj, District Sylhet, u Md.Abdul Hassan 20 snem na Karaputa PS Jagiganj District Sylhet, u Md.Sahid Ahmed 20 snem na Araigan PS Jagiganj District Sylhet, u Md.Kawsor Ahmed 19 snem na Ranigul PS Kanaighan District Sylhet, Md. Imran Ahmed 19 snem na Niagul, PS Jogiganj, District Sylhet. Ya kini waroh 7 ngut da rah cha ka yung bichar yong ka East Jaintia District.
Discussion about this post