Jowai : Ynne ka sngi Chohthat 8 tarik, heipor kamwa 4 waje i janmiet, ar ngut ki damok da pynkulmar ki ha kawi ka thaw kawa em mar pyrchah ka FCI, Mihmyntdu, heiwa kini ki bru da thooh khajia ki ya kiwa sait that ha kawi ka um paidbah kawa em heini.
Neiliang kawi ka manbei, da pyntip ko cha ki pulit ka Jowai Police Station kiwa da wan lura cha kani ka thaw yow takit ya ini iwa jia. Heipor wa dang takit ki pulit, kini ki ar ngut kiwa thooh khajia wei pynkulmar da jrong kti ki ya uwi u sahep pulit, uwa tip pyrtuid kam u Sub-Inspector A. Iawphniaw.
Kini ki ar ngut ki damok da tipmit kam u Bimal Pyrtuh, 30 snem i rta, uwa sah ha Laad-College wa u Firstborn Dkhar uwa 23 snem i rta uwa sah ha Dongmihsngi, Ladthadlaboh. Kini ki arngut da maisih klam sang ki ya ki pulit wei da dat da bok ki ya u SI wa ya ki pulit wa synran ya oo.
Hadien ini, ki pulit da kem ki ya ki wei da rah ki ki cha thanat heiwa da chem wa kini ki arngut toh kiwa dang sma kyiad.
Discussion about this post