Chah kem ar ngut kiwa tooh na ki bru wa lai yaaw

Jowai: Katkam ka yutip wa da yoh na ki pulit da ong wa da yoh ki ya ka ujor na u Fivestarson Suiam uwa na ka chnong Mowkaiaw.

Ha ka ujor u Fivestarson da ong u wa ha ka 13 tarik uni u bnai heipor kamw 2:30 i sngi ha ka sngi yaaw yong ka Muksaw ha Mowkaiaw ki paidbah da yoh ki u ksoh ya ar ngut ki bru wa tip kam u Janaiki Saioo wa na ka chnong Mulieh wa u Suresh Tamang uwa na ka chnong Thikojora, PS: Ronikata, Assam.

Kini ki ar ngut da tooh ki na ki bru kiwa lai yaaw wei heipor wa tooh ki na kawi ka manbei da yoo ki paidbah yeiwa leh ki wei da ksoh ki paidbah ya ki.

Da ong wa hajrong kini ki ar ngut dang em sa uwi uwa tip pyrtuid kam u Kancha uwa da yoh u yut na kani ka thaw.