Jowai: Ynne i miet heipor kamwa 8:00 waje ki dkhot yong ka Union of Straight Brothers kawi na ki Society wa kreh neibynta wow yada ya ka rymaw, da kem ki ya kawi ka truck Shaktiman kawa kit chyiap na ka wah Myntdu ha Treiongriang.
Kani ka Shaktiman toh kawa em number ML 04 B 4103, wei katkam i chemdien, ka Shaktiman toh yong ka (L) M. Nongbet wa na Shillong wei ya ka kari da phah kset cha Demthring wei ki tre ym tip ki wa pynemkaam bakla ya ka.
Ya uwa yah ya ka da tip kam u Ialam Liam (24 snem), wa u handyman wa tip kam u Fivestar Ryngkhlem wa 24 snem wei kini toh kiwa na ka chnong Demthring.
U Ialam da khana u wa ya u chyiap da phah tih da u Phrang uwa na Khimmusniang wei da kam u toh wa uni u chyiap toh u yong oo (Phrang).
Wei da khana u wa da em hi ki kari khian kam ki Pick-up wa kit chyiap na kani ka wah ynne i janmiet.
Kam wow pynkymoo heini ka NGT da khang lut ko ya waroh i tih chyiap tih moo na ka wah Myntdu kamjooh narood yong ka. Heijooh i por ki bor District wa ka JHADC leh da pynmih hukum ki wow khang yeini waroh.
Discussion about this post