U SP ka Ri-Bhoi District da pyntip u wa ki pulit hadien wa da tip tikna ki wa em uwi u bru wa tip kam u Equest Langshiang (31 snem) uwa da suba toh u dkhot ka HNLC wei da ya soohbuit lang u wa ki dkhot kani ka seiñ wa em ha Bangladesh deilang wa kiwi de yow pynchna ya ki Bomb IED yow booh ki ha kiwa boon ki thaw wa em ha Khasi wa Jaiñtia Hills.
Kamtæ ki pulit da lai ki wow ksoh ya u Equest Langshiang hajan ka laad Bethany Hospital, Nongpoh ha ka 20 tarik heipor 12:30 i step synyaaw wei pyn ha ini i thaw da chem kiwa boon ki sabut na ka Phone u, kamtæ da Register Case pyrchah ya oo ha Nongpoh PS da ka Case No.87(08)2024 deiwa pynngat hapoh ki kyndon 113 (3) (5) ka BNS.
Hawa takit ya u Equest Langshiang, da pdiang u wa oo toh u dkhot ka HNLC wei da thmu u deilang wa kiwi ki dkhot ka HNLC wow booh ya ki Bomb IED wei da phla u leh yei pyrtuid yong kiwi ki ar ngut kiwa da ya embynta lang wei da lai kem ya kini na Jowai wa Nartiang wei kini leh da phla ki wa ki toh ki dkhot ka HNLC wei da thmu ki wow tympdung Bomb IED ha ka 14 wa 15 tarik uni u bnai (August) deiwa phah ki heh ki kiwa em ha Bangladesh.
Kini kiwa chah toh u Equest Langshiang (31 snem) uwa chong chnong ka Nartiang, West Jaiñtia Hills.
U Deiborlangki Sariang (31 snem) uwa chong chnong ka Nartiang, West Jaiñtia Hills.
U Markhlan Biam (34 snem) uwa na Laskein, West Jaiñtia Hills.
Discussion about this post