Shillong: Ynne i step heipor kamwa 2:30, nei smat ki bru wow pyntip cha ki pulit da yoh u kem ya 3 ngut ki bru wa thmu u tooh na iwi i dukan wa tip kam i Sham Silvers & Sham Jewelers wa em ha Police Bazar, Shillong.
Ki pulit da wan ki wut wut cha ini i thaw deilang wa ki dkhot ka CRPF kiwa dang sonteri dei miet wei da kær kut ki ya ini i dukan.
Hadien wa pyntip ki pulit cha u tre dukan chaphang ini da wan u wow wai ya ini i dukan wei da yoh kem ya 3 ngut ki bru wa rieh ha paikhana wa em hajrong ini i dukan.
Hadien wa pynman ya ka takit, ki pulit da chem ki wa kini ki 3 ngut da wan ki cha Shillong ha kini ki ar sngi wei da sah ki ha Mahabir Lodge. Chwa wow psiah ki chapoh kani ka dukan da dep sylli ki ya i rukom psiah wei ki pulit da suba ki wa kini ki bru toh kiwa emkti wow tooh na ki dukan dai Mobile Phone ini dadep ha Shillong wa na kiwa boon ki thaw.
Da psiah ki chapoh kani ka dukan deiwa pynemkaam ya ka yingkieñ wa khian wei da ah ki ya ka tnoom dukan dep tæ psiah ki wei da pyntkut ki ya 4 tylli ki CCTV Camera.
Kiwa chah kem da tip kam u Badus Sheikh, 23 snem na Jharkhand, u Bisun Mandal, 41 snem na Jharkhand wa u Md Rafik Sheikh 36 snem na Sahebganj, Jharkhand.
Discussion about this post