U SP ka East Jaiñtia Hills da pyntip u wa da yoh wow kem ya 5 ngut ki khynroo kiwa rah yabor ya uwi u bru wa lai luti na Lumshnong cha Khliehriat.
Ini da jia i ynnin ka 8 tarik heiwa heipor 5:00 waje i janmiet heiwa da pyntip cha ki pulit wa em kawi ka kari Maruti Zen kawa em ya u Number AS-01N-3251 da yang khap ko ya kawi ka kari Bolero Pickup kawa em ya u Number AS-01HC-2790 kawa lai luti na Lumshnong cha Khliehriat heiwa kini kiwa lute da ku ki ya kani ka Pickup wei da yah ki ka deiwa emlang uwa yah hapoh.
Neiliang ki pulit ka East Jaiñtia Hills hadien wa tip yeini da lai ki wut wut yow booh yei thaw pynsangeh kari ha u sarok NH-06 yow thooh ya kiwa emkti wa uwa chah rah bor.
Ki pulit wa yahkhmat da u CI Khliehriat wa u OC Khliehriat Police Station da sdang ki wow thooh ha tymbud u sarok NH-06 heiwa da chem ki ya ka Maruti Zen waka Bolero Pick-up ha ki bynta ka chnong Deinchynrum u sarok NH-06.
Hawa pynlait ya uni uwa chah rah bor, da kem leh ya ki 5 ngut kiwa lute oo deilang wa kawi ka Air Pistol wa pynemkaam ki yow leh ya ini i kaam.
Kini kiwa chah kem toh 3 ngut kiwa dang 19 snem, uwi uwa 22 snem wa uwi uwa 23 snem kiwa waroh na East Jaiñtia Hills District.
