Jowai : Hadien wa chah kem ar ngut kiwa suba dai drugs, ku syndet kiwa pynpsiah pyrtuid wow thooh dawai na Voluntary Health Association of Meghalaya (VHAM) kawa em ha Wahnangbah, Jowai.
Hei yoh u yachem wa kiwa kreh ha ka VHAM Drop-in Centre da pyntip ki wa hadien wa chah kem ki ar ngut kiwa suba dai drugs ha kini ki kajak sngi wa dadep ki bru kiwa dih drugs da sdang ki u wan wow pynpsiah pyrtuid ha kani ka Centre.
Ye u man wa ki bru wa thied drugs na kini ki arngut da tieñ ki ya dooh drugs kamtæ da wan ki cha ka VHAM yow thooh yarap neibhah kiwa dih drugs lada pyndooh drugs ya ki daw em ki ‘Withdrawal Symptoms’ i jait kjut wa sdang manda dooh syndet syndet kiwa da kyrni ym du ki drugs kamjooh leh i kiad, ini i kjut ye i pyndooh thiah, kjut ki mat (joint) kti ki kjat, kjut rupai, man ki ki bru wa smat u chit khlieh wa kiwi.
Hapoh ka VHAM em ka rukom sumaar wa tip kam ka Opioid Substitution Therapy kawa e dawai cha ki wa dih drugs da i dawai wa tip kam i Buprenorphine i dawai wow pyndooh yei kwah drugs iwa ym pynmuaid (High) ya kiwa dih tangwa wa pynhun won yei kwah drugs.
I rukom e ya ini i dawai toh deiwa tylliat næ dung ha u thlong hadooh wa lakhit dep neitæ yow theh ya ini i dawai hapyrdi u thylliej wa i tre ktien. Ya I dawai da e katkaam i bor wa da e da ki doctor wei hap kbum yeini i dawai hapoh u thylliej hadooh wa um lut i.
I bor ini i dawai toh yow pynyap yei kwah drugs deiwa dih tista. Katwa dang lai i por i bor yong i dawai wa pyndih dang pynduna ya ki hadooh wa uwa dih drugs ym emkaam de u ki.
Tangwa hapyrdi wa dang em ha ini i por wa dih dawai sdang biang u dih drugs haap sdang u pynkhlan biang yeini i dawa neibhah ki drugs yei waroh wa da yarap uni u dawai yow pynwiar yei kwah drugs da pynyap lut ki ki.
Kiwa kreh yong ka VHAM leh ong ki wa nadooh ynnin u snem kiwa wan chah sumaar ha ki toh kiwa hapoh 25 snem bait.
Discussion about this post