Jowai : Ha ka miet yong ka 21 tarik ki VDP yong ka chnong Mustem da yoh kem ki ya arngut ki bru wada phla toh kiwa tooh masi ki. Da kem yaki heipor 9:30 i miet katwa dang em ki hapoh kawi ka kari Maruti Alto wa em ya number ML 05 M 7593.
Ya kini ki arngut wa chah kem da tip pyrtuid kam u Siemdohki Rymbai wa u Ebormi Dkhar pynar kiwa na Wapung Chnong. Ong ki wa heipor wa wan ki VDP em ki waroh 5 sngut hapoh kari, ya ki le ngut won kiwa tip pyrtuid kam u Dawa Dkhar na Wapung, u Tre Phawa na Pynthorsale wa u Kamai Dakhar da yoh ki u yut neini i thaw.
U Ebormi hei yaklam u wa kiwa thoh khubor da phla u wa oo toh uwa dadep chah kem u nachwa wa tooh masi u na Loomchyrmit wei da dai u yaki cha Lad Rymbai heidor T. 14 hadooh 15 hajar ka wi.
Da phla u leh wa cha thaiñ Mustem da dep tooh ki la ar tylli ki masi wei da kit yaki hapoh ka kari Gypsy. Ha ka miet wa chah kem ki da kam u, wa oo da lai u cha yung yung ka Wenis Talang kawa toh ka kurim yong oo ha chnong Mustem.
Hadien wa chah kem ki da kset yaki ha ka patok ka chnong yow lait ki nei mynsoo ha kiwa chah tooh masi heiwa du ha uni u bnai la le tylli ki masi da dep chah tooh na kani ka chnong napoh phylloh kawa kynthup yaka yong u Tnenglang Lyngdoh uwa man u khon swet uwa em du kani donhi ka masi kawa ieh ya oo da ka bei wa u pa u.
Ha Mustem da pyntip u secretary wa kattu nadooh u Naiynñiaw (July) yong u 2015 hadooh uni u snem la 7 tylli ki masi da dep chah tooh kamtæ ka chnong da daiñ kuna ko ya kini kiwa tooh heidor yaw yong ka masi T. 30,000 kawi. Kiwa ha yung yong kini kiwa tooh leh da dep wan ki cha ka chnong ynnin ka 22 tarik wei da kular ki u su tangwa ym em wan su ki.
Ka chnong leh da kynnoh ko wa kini kiwa tooh masi dep ki u tooh da tynyap ki yaki masi wei dai yong kilo ki yaki cha yaaw da u bru wa tip kam u Arki Ryngkhlem na Pynthorsale. Hapoh kari wa chong kini kiwa tooh da em leh kawi ka wait wa lang snaam katkam wakam ki tre chnong.
Hadien wada bna wa chah kem kini kiwa tooh masi, ka VDP yong ka Wapung leh da wan ki cha Mustem wei da ong ki wa u Ebormi toh u beimaan tooh masi wei da paan ki leh yow ekti ya oo cha ki tangwa neiliang ka chnong Mustem da kyntait ko yeini lada ym ye u su ya i bai tooh masi u.
Kamtæ ka VDP ka Wapung da booh ujor (FIR) ko ha Lad Rymbai katwa ka Mustem da booh FIR ki ha Jowai PS.
Hei janmiet yong ynne ka 23 tarik ki pulit ka Jowai da wan ki yow chimkti ya ki arngut kiwa da kset ka chnong tangwa neilaing kiwa chong chnong da kyntait ki u e kti yaki lada ym em chwa i thoh i taar ha pyrdi ka chnong wa kini kiwa tooh yow su ki yaka bai masi. Hadein wada kular ki Pulit yow leh yeini ha thanad ki tre chnong da e kti ki ya kini ki ar ngut cha ki pulit wei da kit ya ki cha Jowai PS.
Discussion about this post