Hadien wa em ki bru wa saam chiti dawa poisa, neiliang ki pulit ka Ri-Bhoi da yoh ki wow kem ya ka dhab ka HNLC kawa krehkaam hapoh ka thaaiñ Mawhati-Umroi wa ha Shillong heiwa ki pulit da ong ki wa kani da man ko kam ka Sleeper Cell kani ka seiñ kieñ suloi.
Ya kani ka Sleeper Cell toh kawa da yahkhmat da uwa tip kam u Cyfrank Paul Pariat (25 snem) uwa na chnong Ummat uwa man leh kam u Commander ka HNLC wei deilang wa ki ar ngut kiwa kynthup ya u Kitbok Mujai (23 snem) uwa na chnong Ummat hi wa u Barnabas Lyngdoh (49 snem) uwa na Khyndewsoo, R-Bhoi District da dep saam ki boon tylli ki chithi dawa poisa hei pyrtuid ka HNLC wei da maham ki leh ya kiwa boon lym su ki ya ka poisa wa da chah dawa.
Kamtæ ki pulit ynnin ka 10 tarik lyngba ka Special Team ka Police Headquarter wa ki Ri-Bhoi DEF da lai kem ki ya kini ki le ngut.
Ki pulit da pyntip ki leh wa kini ki le ngut toh kiwa emkti wow thooh ya kiwa kwah u psiah man dkhot ka HNLC kamjooh kiwa pait ya ki kaam poisa poilaiñ wei da lai ki cha Bangladesh ynnin u snem yow yoh yei chah sikai.
Ya kini da pynngat hapoh ki kyndon ka IPC wa kyntup ya ka 120B/506 neitæ ki kyndon 10/13/18 ka UPA Act wei ka takit dang lai ko chakhmat yow thooh ya kiwi kiwa emkti kamjooh kiwa man dkhot ka HNLC.
Ki pulit da kyntu ki leh ya ki paidbah wym toh u tieñ ki manda em kiwa dawa poisa ki wei wow pyntip cha ki pulit yeini.
Discussion about this post