Le ngut kiwa kreh mylla da chah kem ki hadien wa psiah ki pyrchah ya ka aiñ chapoh u pood ka Parliament deiwa pynemkaam da ki Aadhaar wa chna thok iwa da jia ynnin ka sngi.
Ya kini ki le ngut da yoh wow ksoh da ki CISF ha ka khyrdop wow psiah chapoh ka yung Parliament wei da e kti ki cha ki pulit ka Delhi.
Kini kiwa chah kem da tip kam u Kasim, u Monis wa u Soyeb wei da pynngat ki hapoh ki kyndon wa chna thok ya ki kot ki sla wa ki kaam leh thok. Katkam ka FIR da ong wa kini da chah ksoh ki ha ki CISF heipor wa yieñ ki yow yang u psiah heiwa da sylli ya ki kot ki sla namo ki Identity Card wei da chem wa ar ngut em ki da ka Aadhaar Card kawa em i jooh i Serial Number tangwa phær i dur donhi katwa u Soyab won dang takit ya oo.
Hadien wa takit da chem wa ya kini kiwa kreh mylla toh kiwa kreh wa ka Dee Vee Projects Limited kawa pynkreh yow chna ya ka thaw chong ke (Lounge) ki MP hapoh Parliament la le bnai kattu.
Kam wow kdaw heini wa ka CISF da chimkti ko na ka CRPF wa Delhi Police yow e yada ya ka Parliament Complex hadien wa em kiwa yoh u psiah chapoh ka Lok Sabha ha u Kmaichonglad (Dec) 2023 kiwa da yoh leh u kynthiar chapoh ka thaw chong ki MP wei da kawang ki leh ya ki tadong wa mih tdem.
Discussion about this post