Jowai : Ki pulit ka West Jaiñtia Hills da kem ki sa uwi u bru ynne i synñiaw heiyatoh wei chah tynyap u Rapborwell Nonglait ha Mukhla.
Ya uni uwa da chah kem datip pyrtuid kam u Yoowan Dkhar na Mookyndur uwa chong wasah ha Mukhla wei man u leh uwa kamai kari van na Jowai cha Ummulong.
Dakem ya u ma Dkhar hadien wada thoh chithi ka kong Myntoi Rymbai kawa man leh ka bei u President ka Pnar Student Union, u Kyrchan Rymbai wa naka kong Hamran Bang kawa man leh ka kurim yong u Dimon Phawa uwa da chah kem chirup wa u Kyrchan Rymbai. Ha kani ka chithi da kynnoh ki wa u Yoowan Dkhar da tyrrah u ya u Rapborwell Nonglait hadooh wa yap u.
U ma Rapborwell Nonglait da chem ya oo wada yap u haka miet yong ka 9 tarik Naitung (April) 2016 heipor kamwa 11 waje i miet.
Hadooh katni ki pulit da kem ki la soo ngut heiyatoh wei suba chah tynyap u Rapborwell Nonglait iwa kynthup leh ya u Nison Lamare (34) uwa na Mukhla Mission.
U Kyrchan Rymbai wa u Dimon Phawa dakaam ki wa ha katai ka miet kini ki arngut da chong ki daka kari u Nison heiwa u ma Rapborwell leh emlang hapoh katai ka kari, ong ki wa da hiar chwa ki napoh kari. U ma Nison ong u wa u ma Rapborwell leh da hiar u napoh kari u ha chwa u poi u cha i yung yong oo.
Hadien i chah kem u ma Yoowan, da suba wa ye u man wa u ma Yoowan wan u da ka yong oo ka Maruti Van hadien wa hiar u ma Rapborwell wei da tyrrah (accident) u oo hadooh wa yap.
Discussion about this post