Ka Enforcement Directorate ynne da lai kem ko ya u MLA ka Congress na Karnataka, u KC Veerendra ha Sikkim heiyatoh wa ki kaam yathong yakhle wa man pyrchah aiñ wei da lai u cha Sikkim deilang wa kiwi dei thmu wow chim wai ya iwi i thaw yow wai Casino.
Ya uni u MLA da lai rah hakhmat u Judicial Magistrate ka Gangtok yow paan bor u lai yah oo cha Bangalore.
I kem ya uni u MLA toh hadien wa ynnin da lai kynreh ya 31 tylli ki thaw wa kynthup ya ka Gangtok, Chitradurga District, Bangalore, Hubli, Jodhpur, Mumbai wa Goa deilang 5 tylli ki Casino kitæ ka Puppy’s Casino Gold, Ocean Rivers Casino, Puppy’s Casino Pride, Ocean 7 Casino, Big Daddy wa Casinoya.
Hawa lai kynreh da chem ya ka poisa wa Rs. 12 klur, ki Casino Card na kylleiñ ka pyrthai, soo tylli ki kari sy’at dor, kamwa Rs. 1 klur ki poisa pharæng wa i ksiar i rupa wa Rs. 6 klur.
Ki dur wa da pynmih ka ED da pynyoo ya ki poisa, ki International Casino Membership næ ki Reward Card na ka MGM Casino, Metropolitan Casino, Bellagio Casino, Marina Casino wa Casino Jewel.
Chooh chooh da chem leh chiboon ki Credit wa Debit Card na ki Bank waphær waphær, ki Membership Card ki Hotel kam ka Taj, Hyatt wa The Leela.
Ki soo tylli ki kari kynthup ki ya ka Mercedes rong soo wa em Number Plate ka Karnataka.
U KC Veerendra, toh uwa 50 snem i rta wei man u u MLA na Chitradurga heiwa da emkti u ha ki kaam yathong Online wa Offline wei da pynlai u leh ya ki Website yathong wa tip kam ka King567, Rajaj567, Puppy’s003 wa ka Rathna Gaming.
Ka ED chem ko leh chiboon ki kot thaw na yung u payu u Veerendra, u KC Nagaraj wa u khon u, u Pruthvi N Raj.
I takit ya u KC Veerendra toh katkam ki kyndon ka aiñ Prevention of Money Laundering Act (PMLA).
Discussion about this post