Ynne ka sngi ki pulit ka West Khasi Hills da kem noh ki ya u Arful Kharbani uwa man u President ka Mining Association, uwa man leh heijooh i por kam u President ka HANM West Khasi Hills.
Katkam ki yutip wa da yoh, ya u Kharbani da kem hadien wa dat u ya u Manager ka Shekambari Ferro Alloy Pvt. Ltd. neidaw wym pynlait de ya ka Bill yong oo da ka Company.
Ini da jia i heipor 11:00 i step ka 25 tarik, heiwa u Manager kani ka karkhana saiñ naar da ong u wa ya ka poisa u Kharbani da dep thap ha ka Account, tangwa u Arful da kam u wa ym em poi katæ ka poisa wei hadien ini da dat u ya u Manager ya uwa tip kam u Mahesh hadooh wa da mynsoo u wei da tympiah u leh ya ki tiar ki tar wa ya ka TV, ka Fridge wa ka Mobile.
Neiliang ki tre ka karkhana da ujor pyrchah ki ya u Arful cha ki pulit, wei ki pulit da hiar ki cha ini i thaw wow leh yeiwa emkaam.
