Hadien wa pynman yei kynreh wa boon heijooh i por da ka Ministry of Corporate Affairs ha ka 8 tarik uni u bnai ha ki yung krehkaam ka Jillian Consultants India Private Ltd, kawa mantre da ka Jilian Hong Kong Ltd., ha Gurgaon, ka Fininty Pvt Ltd ha Bangalore waka Husys Consulting Ltd kawa da jooh em ha Hyderabad, neiliang ka Serious Fraud Investigation Office (SFIO) da kem ko ya u bru wa tip kam u Dortse ynnin ka sngi.
U Dortse toh u dkhot ka Board of Jillian India Ltd wei da man u kam i jabieñ wow pynyabi lang ya kiwa boon ki Company wa em du i pyrtuid yow pynemkaam ya ki wow pynlai poisa waka China ha India deiwa pynyieñ leh ya ki Director kiwa du hei pyrtuid kiwa ym em iwon iwon i bor hapoh kini ki Company.
U Dortse da pynyoo u wa oo toh uwa chong chnong ka Mandi ha Himachal Pradesh katkam ki kot ki sla wa em ha ka Registrar of Companies (ROC).
Katkam ka sabut wa da yoh ka ROC Delhi hawa takit wei heipor wa pynman yei kynreh da kdaw che wa ya ki Director wa da thung hi-eh da su ya ki da ka Jilian India Ltd. yow man kam ki khlieh kini ki Company wa em du i pyrtuid. Da chem leh ya ki synduk wa em ya ki muhor (Seal) kini ki Company wa ki Digital Signature yong kini ki Director na ki thaw wa lai kynreh.
Kiwa kreh napoh India da yaklam ki wa kiwa na China lyngba kawi ka Instant Messaging App wa chna da ka China. Da chem leh wa ka Husys Ltd. toh kawa kreh neibynta ka Jilian India Ltd. Katkma wa da chem ka takit, ka Husys Ltd. toh kawa da em i sñiawthooh waka Jilian Hong Kong Ltd. Ka takit leh da chem ko wa ye u emkti kini ki Company wow pynlai pynwan ya ka poisa iwa ye u kteh ya ki kaam poisa poilaiñ ka ri.
Ka Ministry of Corporate Affairs, hapoh i pyrtuid ka SFIO da takit ko ya ka Jilian Consultants India Private Limited wa 32 tylli kiwi ki Company ha ka 9 tarik uni u bnai. U Dortse wa uwi u nong China da man ki kam ki Director ka Jilian Consultants India Private Limited. Katkam ka takit da chem wa u Dortse da yut u na Delhi NCR cha iwi i thaw ha Bihar wei da pyrchang u wo yut napoh India lyngba u sarok.
Kamtæ da phah wut wut ya ki bru ka SFIO kiwa da lai cha ka thaw wa em u ha Bihar ynnin ka 10 tarik wei da kem ya u Dortse, uwa da lai rah ki pulit cha ka yung bichaar yow yoh bor u kit ya oo.
