Ki paidbah da chah khang luti ki ha ki bor ka aiñ wa ha ki bru wa kahdur khmat da ki that rong yong ha chwa wow psiah ha u sarok Bataw (Lad Bataw) wow lai cha ka pynsñiaw paidbah namo ka Public Hearing kawa man ha chnong Bataw hajrong ka Myntdu Leshka Stage-II Hyrdo Electric Project neibynta u lai ap wei u pynsñiaw ya i eh i khor yong kiwa chong chnong kiwa sah hajan ka Wah Myntdu.
Kiwa chah khang luti toh ki paidbah yong ki chnong napoh yong ka Elaka Lakdong kamjooh na ka chnong Suchen Pyllun wa kiwi de kiwa da thmu u lai ap ya kani ka Public Hearing ynne ka sngi.
Neitæ hadien wa yaklam wa u OC ka Ladrymbai Police Outpost da e laad won ya ki wow lai cha kani ka Public Hearing tangwa du ya ki waheh chnong wa ki heh Elaka heiwa ki paidbah da hap ki wow lai liwan yaamrem cha jar jiar ki chnong yong ki.
Kamtæ kani da pynman ko ya ki paidbah wow pyrkhat wa em iyi leiyi chalyndet neibhah da em chwa ki bru wa kahdur khmat kiwa yang nadooh 8:00 waje i step hadooh 11:00 waje sngi chwa u man ka Hearing ha man ki laad wow psiah chapoh ka chnong Bataw ka thaw wa pynman ya kani ka yalang paidbah.
Neiliang ki paidbah wa ki heh chnong waphær waphær da beiñ joor ki ya ini i leh embor kini ki bru wa kahdur khmat kiwa da khang ya ki paidbah wow lai cha kani ka pynsñiaw paidbah.
