Kiwa yoh myntoi na kiwa boon ki Scheme sorkar pyrdi ha Meghalaya daw yoh ki wow sakhi ya ka lehkmen Independence Day ha Red Fort, Delhi ha kani ka 15 tarik kam kiwa chah khut sñiawbha kyrpang namo ki Special Guest.
Da em kamwa 1,700 ngut na kylleiñ ka ri kiwa da yoh myntoi na ka Jal Jeevan Mission (JJM), PM Kisan Samman Nidhi Yojna, Amrit Sarovar Yojna, Central Vista Project wa kiwi kiwi de kiwa da chah khut yow up u sñiaw yeiwa klam u Prime Minister Narendra Modi na kani ka thaw wa bna naam ka ri.
Kani man ko leh kam chibynta ka thong ‘Jan Bhagidar’ namo i chimbynta ki paidbah, kamtæ ki le ngut kiwa yoh myntoi na ka JJM hapoh Meghalaya da chah khut ki kam ki Special Guest ha kani ka lehkhmen Independence Day ha New Delhi.
Ka JJM toh kawa da pynkylla yei rukom im kiwa boon ha Meghalaya. Ka Gloria Umsong na Makwkynrew, East Khasi Hills, u Jenesiuis Marwein na Makwkynrew, East Khasi Hills waka Babiangmon Lapang na Mawphrew, Ri-Bhoi District daw chimbynta lang ki neibynta ka Meghalaya.
Ka Gloria Umsong da ong ko wa ka JJM da pynkylla ko yei rukom im ki kynthai hapoh ka chnong ko nadooh wa yoh umkor ki ha yung ki nadooh u snem 2020 neibhah nachwa da hap pynlut por chiboon du wow lai tong um.
U Jenesiuis Marwein leh da ong u wa i yoh umkor nadooh u 2020 da lait ki wow lai tong um na jngai kam na ki wah wei da e khublei u leh ya u Prime Minister yeini wa chemphang u wow pyrkhat u pynyoh umkor cha kawi pa kawi ka manyung.
Ka Babiangmon Lapang won da ong ko wa nachwa da hap wow yachoh para jan yung heipor wa lai diang um tangwa hadien u 2022 nadooh wa yoh um ha yung da lait na ini waroh.
Kiwi de kiwa yoh myntoi kam na ka Amrit Sarovar, kitæ ka Merisuklin Syngkon na East Jaiñtia Hills, u Meduwin Marak waka Delpinna Sangma na East Garo Hills leh da chah khut sñiawbha ki wow sakhi ya kani ka lehkmen Independence Day ha New Delhi.
U Meduwin Marak uwa na chnong Rongjeng, East Garo Hills da pynsñiaw u yei sarong wow man kam uwi na kiwa chah khut sñiawbha yow ap yeiwa klam u Prime Minister ha Red Fort. Da ong u leh wa kani ka Amrit Sarovar toh kawa da e yarap ya oo wow yoh kreh deiwa yoh nan u psan dakha wei oo deilang waka Delpinna Sangma toh kiwa psan dakha ha East Garo Hills.
Kini kiwa chah khut sñiawbha daw yoh ki leh wow lai cha ka National War Memorial waka Pradhan Mantri Sangrahalya (Prime Minister’s Museum) ha New Delhi.
Discussion about this post