Shillong: Ki wakreh ka chnat i chait i khiah ha waroh ki khyrdop wa wanpsiah kiwa chong chnong ka jylla wa sah cha kiwi ki jylla ka thaaiñ mihsngi (Northeast) da pynman ki yei pait bniah wei ya i Test ya waroh kiwa liwan yow pyntikna wa ym em ki i dak i chin wa chitom. Tangwa kiwa liwan lyngba ka khyrdop wa ha Byrnihat da em ki palat 400 ngut kiwa chong chnong, wei napyrdi kini da ksoh ya ki 2 ngut kiwa suba wa em ki ya ki dak chitom.
Hawa yaklam wa u District Medical and Health Officer ka Ri-Bhoi district, u Dr. M. Mawrie da pyntip u wa da em palat 400 ngut kiwa liwan na katai ka khyrdop ynne ka sngi, wei ka chnat da ksoh ko ya 2 ngut kiwa chong chnong neibhah wa em ki yei iñdoh heipor wa leh ya ka Rapid Anti-body Test, wei kini da chem iwi hei step wa iwa heipor janmiet.
U Dr. Mawrie da pyntip u wa ya kini ki 2 ngut da leh saka RT-PCR Test ya chah ktah ki ha u COVID- 19, wei yaka Report ye u yoh hadien ka 24 kynta, deiwa pyntip leh wa neiliang ka chnat i chait i khiah, da booh chwa ya kini waroh 2 ngut ha ki thaw wa da pynkhreh kyrpang hadooh wow yoh yaka Report.
Chooh chooh da ong wa hadooh kattæ da em 7 ngut wa da chah ksoh chwa yow leh Quarantine hadooh wow yoh ya ka Report, deiwa kynthup ya kitu kiwa chong lang da ka jooh ka kari wa kitai kiwa suba em kjut. Da pyntip wa ya kitai leh da phah leh ya ka RT-PCR Test wow pyntikna.
Da ong u leh wa lada ka Report pynyoo ko wa ym em chah ktah ha u COVID-19 daw phah noh ya ki cha ki chnong yong ki hi, tangwa lada ka Report man ko kawa Positive hap wow yah noh ya ki cha ki thaw sumaar wa da pynkhreh da ka sorkar.
Discussion about this post