Ka kynthai kawa na Arunachal Pradesh da pynbaad ko ya ki bor sorkar ka China wa ksoh ki ka wei pyndik pynchitom ki ka ha Shanghai Airport dei wym bien u tipmit wei pdiang ya ka Passport India ko heipor wa lai lut ko deiwa hap sangeh ha Shanghai.
Kani ka kynthai toh kawa tip kam ka Pema Wang Thongdok kiwa im ha UK, da ong ko wa ki Immigration Official ha Shanghai Pudong Airport da ksoh ki ka 18 kynta ha ka 21 tarik uni u bnai deiwa ong wa ka Passport toh ka wym krehkaam neidaw wa kha ya ka ha Arunachal Pradesh neidaw wa ini i thaw man ko kam chibynta ka ri China.
Ka Thongdok toh kawa sah ha England wei da mih ko na London yow lai cha Japan tangwa da hap ko wow hiar ha Shanghai yow chim da kawi won ka lieñsuiñ deiwa hap yang le kynta.
Kiwa kreh kani ka Airport ha Shangshai da ksoh ki leh ya ka Passport ko deiwa ong wa ym em tipmit ki ya ka Arunachal Pradesh neibhah wa haap ko ha China wei ym chah ki leh wow ku ko ya ka lieñsuiñ yow lai cha Japan hanla em ko ya ka Visa wa biang.
Da ong ko leh wa da em kiwa kreh ka Airport deilang ka China Eastern Airlines wa ong ki ya ka wow yaleh ko da ka Passport ka China wei ym chah ki leh ya ka wow thied baam ko wot hadooh wow pynemkaam ya ki paikhana.
Hawa khaddooh da chah wow mih ko deiwa pynbor ya ka wow thied da ka Ticket ka China Eastern Airlines iwa mut da sepai ka Ticket wa dadep thied chwa ko deiwa hap ko wow thied ya ka Ticket wa thymme.
Yeini wa jia ya ka da pyntip ko cha ki lok ko wa em ha UK kiwa da pyntip cha ki bor sorkar kiwa da tuklar yow ye ko wow mih na kani ka Airport.
Da ong ko wa ini wa jia toh iwa yoobeiñ ya u pood u ang ka ri India deiwa kyntu ya u Prime Minister ka ri, u Narendra Modi wow yarap wow pynyoh biang ya ka poisa wa hap ko wow pynlut wei wow pyntikna leh wa kiwi kiwa na India khamtam kiwa na Arunachal Pradesh ym hap de ki wow maad yeini.
Ini da jia i wot hadien wa ka India wa ka China da mynjur ki wow hær biang ki lieñsuiñ hapyrdi kini ki ar ri.
Discussion about this post