I pyndooh bordiñ ka sorkar khlem da pynbna, khlem da booh por da ktah ko yei pynpoi umkor ha chnong Jowai heiwa ki paidbah da ood ki wym yoh umkor de ki deiwa tista.
Ka chnat PHE da pyntip ki wa ki leh da chem chitom ki wow pynkrehkaam ya ki kor yow taan um na ki thaw taan um kam na Umngot neibhah ki kor ym ye ki wow krehkaam khlem ka bordiñ wei ym ye wow pynemkaam da ki Generator neibhah kini ki kor toh kiwa emkaam bordiñ chiboon bha.
Da e nongmuna ki wa kam ka top um wa em ha Govt. Boys’ Higher Secondary School, Jowai kamjooh ka kawa em ha Moolisksoo toh kiwa da chimpor hadooh 6 kynta wow dap ki wei cha kini da Pump heipor chitieñ synyaaw wei ini toh i por wa pyndooh bordiñ katwa kiwon ki thaw wa booh por wow Pump um heipor wa em bordiñ ym chah ktah ki.
Da pyntip leh wa neidaw wa da booh dei por wow taan um cha ki top um, da em ki wym dap um iwa da ktah kylla ya ki paidbah neibhah lada ye tang u pyndap um ya ki top, ka umkor dapoi neibhah sah sa du u pynlait donhi ya ka um cha ki paidbah ymtoh deiwa pynemkaam da ki kor bordiñ.
Em leh ki thaw won wa hap pynemkaam da ki Pump yow phah ya ka um cha ki bru tangwa kini leh da chem chitom wow krehkaam ki lada dooh bordiñ heipor wa Pump um ki wei da chimpor hadooh chi kynta yow pyndap um ya ki Pipe lada dooh bordiñ heipor wa Pump um.
Iwa eh dooh toh wa hadooh kiwa kreh ka MeECL ha Jowai leh ym tip ki ha iwon i por wa daw pyndooh bordiñ neibhah cha ki leh ym em pyntip da ki bor wa haneiñ.
Kamtæ ka PHE lada pteiñ ini i pyndooh bordiñ khlem da tip por, daw pynkylla noh ko yei taan um yow pyntikna wa ki paidbah ym dooh um ki dei boon sngi deiwa pynpoi um dei sngi pood iwa mut wow pyndap ya ki top wym dap um khlem da bood de ya i por wa da jooh leh.
