Shillong: Ka Joint Action Committee of Khasi Jaiñtia Land Owners and Quarry Association (JACKJLOQA ) da kyntu ko ya ka sorkar jylla wow pyllait noh ko ya ki TC namo ki Transit Challan neibynta wow challan noh ya u moochuni uwa dang sah neibhah ini da ktah joor i ya ki hajar ngut ki bru.
Ka sorkar jylla da phah sangeh ko yei challan ya uni u mar cha Bangladesh nadooh u Thohlakhmi (February) hadien wa hukum wa emkaam wow yoh ya ka license wow tih mar poh khyndaw wei wow challan ya ki hadien wa mih ka Meghalaya Minor Mineral Concession Rules, 2016.
Hei yaklam wa kiwa pathai khubor ynne ka sngi u president ka JACKJLOQA u Ribanroilang Lyngdoh da ong u wa heipor wa sylli ya ka Khasi wa Jaiñtia Hills da chem wa chah ktah bha ki paidbah neibhah ym em khih em kreh de, wei ki khynnah haap dam skur noh ki neibhah ym em wa bien u su bai skur ya ki.
Da ong u wa nadooh u Naichiphaw (October) 2016 wa pyndam ya ka Transit Challan da chah ktah kiwa dai cha, kiwa dai kwai, kiwa khih mylla wa kiwi kiwi.
“I kyrpaad i na ka sorkar wow pyllait noh ya ki TC khnang wow ye i u challan ya ki mar (Moochuni) kiwa da dep tih chwa ka hukum ka High Court ha ka 30 Naiynru, 2015 kawa ong wa emkaam wow yoh ya ka license wow tih wei wow challan moochuni” da ong u Lyngdoh.
Neiliang u Jrop Singh Nongkhlaw uwa man kam u general secretary ka seiñ da kyntu u wa ka sorkar toh u pyllait ko ya ki challan wa chipor chwa wow yoh license wei wow yoh pynkhreh Mining Plan ki tre paar.
(Feature Image-Representational)
Discussion about this post