Chah ktah kiwa boon nei slem ka NEHU wow pynbna Result

Shillong: I slem wow pynbna ya ka Result yong kiwa puræ ka 6^th Semester da ka North Eastern Hills University (NEHU) da ktah ko yaka mynried wa kamwa 24 ngut kiwa da thap neibynta wow yoh yaka puræ ha kiwi ki skurbah kiwa em ha ka ri.

Katkam i ong ka President yong ka NEHU Students Union (NEHUSU), ka Genuica Majaw, da yoh yutip wa em kamwa 24 ngut kiwa puræ na kani ka jylla kiwa kwah wow lai puræ ha ki kyrdan wa rap heh cha kiwi won ki skurbah kiwa em ha ka ri India, tangwa da hap wow kut noh neidaw wa ym ye ki u yoh yaka Certificate wa da pyndep puræ Degree ha i por wa biang.

Kam wow pynkynmoo, ka NEHU ka da slem ko wow pyllait ya ka Result BA 6^th Semester kawa da pynman nadooh u Wisu (March) uni u snem hadooh wa da chem chitom kiwa puræ na ini i pynslem yong ka NEHU wow pynmih Result, kawa da pynman leh ya kiwa puræ hapoh ka NEHU Student Union wow pynman yakhih ha pchem katai ka skurbah.

Wow pynsñiaw yei eh wa kiwa puræ yachem ki, ynne ka sngi kiwa em hapoh ka NEHUSU da emlang ki wa ki dkhot ka Khasi Student’s Union (KSU) Education Cell wa da yahkhmat da u Readyon Nongrum wa ki dkhot ka KSU NEHU Unit, da pynman biang ki da ka yakhih hakhmat ka pchem ka NEHU.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Hadien wa kiwa puræ wa ki dkhot ka KSU da yoh ki wow yachem wa u Vice chancellor wa u Registrar, neiliang kini ki heh ka skurbah da kular ki wow pynbna noh ya ka Result ynne i janmiet, wei neiliang ka NEHU da pyllait syndon ko ya ka Result wa kiwa puræ da ye ki wow pait lyngba ka Website www.nehu.ac.in.