Jowai : Ynne ka sngi heipor kamwa 2:30 da em i jia wa phylla dooh ha pchem ka Jowai Police Station iwa yoo kjut nood iwa da pynwiar buit wat ya ki pulit wa em ha ka thanat.
Neiliang u Wyrta da yoh u wow sakhi ya kawi ka manbei kawa da yieñ hadien ka kari pulit Gypsy kawa da tim ya ki pulit deisih dei sang.
Hei ong ki pulit da pyntip wa nadooh ka miet sngichohthat 9 tarik da em kawi ka bru kawa uiñ wei thiah cha sarok waka khon ko kawa dang 3 snem i rta wei ynnin i miet ki dkhot ka Lion Mission Compound da pyntip ki cha ki pulit wa em kawi ka bru kawa thiah cha sarok dei miet chirup wa ka khynnah.
Hadien ini ki pulit da lithooh wei da yah ya ka cha Jowai Police Station heiwa da e baam e dih ki ya kani ka bru wa ka khon ko wei da e thawsah leh kamjooh ya ki pynar. Ya kani ka manbei da tip kam ka kong Pham Chyrmang na ka chnong Jalaphet, East Jaiñtia Hills.
Ynne i step ki pulit da pyntip ki cha ka Childline kiwa da wan wei kiwa kreh ka Childline da pyntip ki wa da jooh yatyngkhooh ki wakani ka bru wei man ko leh kawa duna hei bor pyrkhat.
Hadien ini ki pulit da yah ki ya ki pynar cha Civil Hospital neibynta ka Medical Checkup heiwa ki pynar man ki kiwa chait wa khiah, wei da yah won ya ki cha yung Kasari.
Ka Kasari da e hukum ko wa toh u booh ya kani ka manbei cha Meghalaya Institute of Mental Health and Neurological Science (MIMHANS) wow yoh ko yei sumar wa biang wei neiliang ki Childline da kyntu wow pynyait chwa ya kani ka khynnah na ka bei ko neibhah wa da jooh yachem ki wa ka dei langær.
Manda yoh ya ka hukum na ka yung Kasari ki pulit da pyrchang ki u kit ya kani ka manbei cha Shillong deiwa pynyakhlad ya ka na ka khon ko ya ka wow ri chipor da ka Childline heini da mih i awri awra.
Kani ka manbei da sdang ko u suba sih ya ki pulit wei da kyntait ko u psiah hapoh ka Gypsy khlem em wa ka khon yong ka, heiwa da maisih maisang ko ya ki pulit wei da paan ko leh ya ka khon yong ka na ki pulit.
Ki pulit kynthai da pyrchang ki u thap yabor ya ka tangwa kani ka manbei da yakhun ko wa ki pulit wei da paan ma paan ko ya ka khon yong ka wei da pyrchang ki ka u kdoh da u hatkari.
Hadien wym ye ki pulit u pynpsiah ya ka chapoh kari da dam ki u ksoh ya ka wei da pynmih noh ya ka khon yong ka kam ka laad yow pynjemnood ya ka. Wei manda pynmih ya kani ka khynnah, kani ka khynnah da yaam wei da phet ko cha ka ka kong Pham kawa da bah ya kani ka khynnah da ka speiñkhlieh wei da mut ko u liwan.
Heini kiwa kreh ka Childline wa ki pulit da khang ki ka wei da mih biang i yakhun heiwa ki pulit da pyrchang biang ki u u chim ya kani ka khynnah heiwa da ye u pyllait ya kani ka khynnah wei da ksoh biang ya ka kong Pham, heiwa ka kong Pham dei chrai yeini i leh ki pulit da kdong ko ya kawi ka pulit kynthai yow dat ka ka.
Hadien kattu katni por da pynpsiah yabor ya ka kong Pham ha ka kari Childline wei da yoh u pyndait hatkari ya ka kamjooh leh da pynpsiah ya ka khon yong ka hapoh kani ka kari, heini ka kong Pham da kbai wei da dawa ko leh yow pynlait ya u hatkari na kti ko. Heini ka kong Pham dei chrai da dat ko ya kawi ka pulit kynthai kawa da toh da u Hatkari na thnga.
Ka kong Pham han lym em u jemnood ko da kit bait ya ka da kani ka kari wei da bood won nadien da ka kari ki pulit.
Heini i jia waroh da em ki pulit kynthai kiwa da takha malum malæ.
Heiyoh u yaklam wa ki kattu katni ngut ki bru kiwa jooh yoo wei tipmit da ong wa kani kani ka bru toh ka sdiah na kawi ka manyung na ka chnong Jalaphet. Hadien wada yoh kurim ko da u Kristan wei ka ka Niamtre da kyntait ya ka na yung wei da pyndooh yei hok yong ka waroh.
Manda jia ini kani ka manbei da uiñ beit ko wei jooh poi bha ko ha JHADC wow kyntu wow maham ya ki wym hoi u e i thaw yong ka cha kiwi ki bru.
Ye u man wa neini i jia wa chah kyntait ko da poi hadooh uni u pood ya kani ka manbei.
Discussion about this post