Kiwa maya bol ka Hong Kong kiwa da pynlut hadooh Rs. 10,000 ka bai Ticket yow pait yei yalehbol u Lionel Messi, da pynyoo ki yei chrai deiwa kynjat syndon yei khlieh i dur u Messi hadien wym em mih madan u yow yalehbol heipor wa ka liang yong oo ka Inter Miami da wan ko cha Hong Kong yow yaleh pyrchah yaka Hong Kong XI.
Ka Inter Miami da jop suk ko ya kani ka yalehke da 4-1.
Ym du u Messi wa khlem mih madan tangwa u Luis Suarez leh da chong bait u wei khlem mih u kam u Substitute.
Manda poi ka kylla miet, ki paidbah da kbai ki “We want Messi” tangwa khlem mih u hadooh wa kut.
Hadien wa kut ka yalehke da hap wow mih chakhmat da u David Beckham uwa man kam uwi na ki tre ka Inter Miami yow e khublei ya ki paidbah wa da wan pait ya kani ka yalehke tangwa ki paidbah da kbai ki deiwa chrai wei da dawa ki leh wow pynuiñ yaka poisa wa da pynlut ki 1000 Hong Kong Dollar kawa dapoi hadooh 10,619 da ka poisa India.
Neiliang ka sorkar ka Hong Kong leh da pynsñiaw ko yei sñiawsih wym em mih yalehke u Messi wei da phah ya kiwa pynman ya kani ka yalehbol wow pynche ki yeini neibhah da pynbait wow yalehke u Messi 45 minit.
Da poor leh iwi i Video yong uwi u bru uwa da chrai deiwa lai kynjat u yei khlieh yong i dur u Messi wa da booh ha kani ka madan.
Neiliang u Manager ka Inter Miami, u Gerardo Martino da paan maap u na ki paidbah deiwa ong wa ku ksah ka ksep u Messi iwa da pynman ya oo wym ye u wow mih madan wei da ong u leh kamjooh u Luis Suarez leh ym em biang i khlieh-kyru u wow yalehke kamtæ da hap pyrkhat lada mynsoo ki deiwa phah yalehke ki.
Ki paidbah wa da wan paitke da em ki hadooh 38,323 ngut.
Discussion about this post