Khliehriat: Ka seiñ Meghalaya People’s United Front-East Jaintia Hills District (MPUF-EJHD) ryngkat wa ka Khliehriat Circle hapoh i yahkhmat u President ka seiñ u Michal Chyrmang wa u President ka Khliehriat Circle u Kyrshan Blah, mar yoh ujor na kawi ka manbei, ka seiñ da lai pynchitom ko ya uwi u baar jylla uwa chong dai juti ha iwi i dukan ha Khliehriat ya uwa tip kam u Abdul Karim na ka chnong Silchar.
Katkam i ong kani ka manbei heipor wa dang pait juti ko ya ka khon yong ka ha ini i dukan, u Abdul Karim da pyrchang u wow pynjan cha kani ka manbei deiwa pyndur wow pynyoo juti neitæ da klam u ya ki ktien khlemakor ya ka wei da pynbor u ya ka wow e ya u Number Phone yong ka.
Ym du kattæ ka manbei da ong ko wa da thap u du chiliang-kjat ka juti ha ka synduk wei da suba wa da leh u kamni khnang wa kani ka manbei daw wan biang ko cha dukan yong oo wow phon wow paan ya u Number yong ka.
Ka seiñ da sñiaw phylla ko leh wa uni u baar jylla ym em u ya ka Trading License wow pynyoo ya ka seiñ.
Ka seiñ da ong ko wa ini i nood uni u baar jylla wow leh kamni ya ki Khasi Pnar toh neidaw wa em ki heh spah wa yada ya oo lym kamtæ ym nood u wow leh kamni.
Ka seiñ khaddooh da maham ko ya ki baar jylla wa lada dang chem ko wa leh ki kamni daw pynchitom ko ya ki kamwa da leh ya u Abdul Karim.
Da kyntu ko leh ya kiwi ki manbei wa ki khynnah wa lada chah klam khlemakor ki neini chakhmat wow pyntip wut-wut cha ka seiñ khnang wow ye ka seiñ u leh yeiwa emkaam.
Discussion about this post