Kawi ka yungmane ka Balang Catholic wa em Narayanpur District ka jylla Chhattisgarh ynnin ka 2 tarik da chah pynsih chah tympra ko ha kiwa chong chnong neidaw wa suba wa pynkylla niam yabor wei heini i jia da em leh u pulit wa da mynsoo hadien wa da pyrchang ki pulit wow khang ya ini wa jia.
Hachwa ynnin, haka 31-12-22, ki jaitbru ri-loom kani ka thaw da pynman ki yei lai paidbah pyrchah yeiwa da pynbaad ki wa em i pynkylla niam ya ki bru heiwa da mih i yachoh yadat hapyrdi ki jaitbru ri-loom kani ka thaw wa dang bood ya ka niam tynre wa ki jaitbru ri-loom kiwa da kylla Christan.
Kamtæ ynnin, ki dkhot ka Sarva Adivasi Samaj da pynman yakhih ki heiwa ki bor District da phah ki leh ya ki pulit yow sonteri wow lait u mih iwon iwon i awri awra.
Tangwa da em kiwa yohlaad wow tympra ya ki bynta kani ka yungmane kam yei motdur ka Mary heiwa u Sadanand Kumar SP uwa emlang heini leh da mynsoo u hawa pyrchang u wow pyn jai-jai ya ki paidbah.
U SP da pyntip u leh wa ynnin hi ka sngi da dep wow pynman ya ka yalang deilang wa u DC heiwa da khut leh ya kiwa yahkhmat kiwa pynman yakhih wow man ki kiwa jai-jai tangwa da em kiwa lai cha kani ka yungmane yow leh pynsih ka.
Kini kiwa yakhih nyngkong da kawang moo ki wei syndet syndet da psiah ki chapoh ka yungmane heiwa da tympra lut ki ya iwa em hapoh wa kynthup ya u motdur u Jisu deiwa pynemkaam da ki dieñ wa ki naar wa rah ki kamjooh leh ka Grotto ka Mary.
Ha ini i thaw wa em ka yungmane da em leh ka Viswadeepti High School wei dang man skur ha itai i por wa jia tangwa da ye wow pynmih ya ki khynnah nadien yow lait ki nei mynsoo.
Kani ka yungmane toh kawa da em la 50 snem tangwa da pynchna ka deiwi ha kini ki 5 snem wa da lai.
Ini waroh wa jia toh neidaw wa ki jaitbru ri-loom ha kini ki thaw kiwa dang bood ya ka niam tynre yong ki da kwah ki wa ki jaitbru yong ki wow uiñ biang ki cha ka niam tynre wei ki wym bien da chah beh chnong ki.
