Ka seiñ ki tre Truck wa kiwa yah Truck wa em hapoh ka lama yong ka Meghalaya Commercial Truck Owners and Drivers Association (MCTODA) ha ka 14 tarik uni u bnai dadep pynbna paidbah ki wow sdang yakhih wa khlem booh por nadooh ka 27 tarik uni hi u bnai deiwa ksoh ya waroh ki Truck wa kit Cement wa Clinker kiwa wan na ka thaaiñ East Jaiñtia, neibhah wa ki Company wa pynmih khyndaw bilat hadooh katni ym pu bien ki u su bai kit ya ki hei dor wow ya imlang katkam i dor sorkar wot hawa boonsien dadep e ki dei thoh cha ki wei da yaklam pynbait leh hakhmat u DC ka East Jaiñtia Hills District.
Ya ka yakhih ka seiñ da pynkhreh ko u pynman ha u sarok Jowai Bypass ha Soomer Mihmyntdu chadooh Khliehtyrchi neibhah wa ha kini ki thaw da yoh bor ki na ki chnong.
Katwa ka seiñ dang yang ko u poi katai ka sngi sdang yakhih kat u yoo ha ka 24 tarik uni u bnai da yoh chithi ko na u DC ka West Jaiñtia Hills uwa da ong wym chah u pynman yakhih ki.
Heijooh i por leh ki dkhot ka MCTODA khana ki wa neiliang ki bor pulit ka West Jaiñtia Hills leh da Phone maham ki ya ki wa lada pynman yakhih ki daw kem ya ki.
Kamtæ neiliang ki dkhot ka MCTODA Jaiñtia Unit ynne ka 25 tarik da pynman yalang ki ha pchem ka Community Hall Khliehtyrchi yow ya phyllu ya pyrkhat heiyatoh wa ka yakhih wow man ha ka 27 tarik uni u bnai wei da emlang nadooh kiwa yahkhmat ka Central Body wa kynthup ya u President, u Mosklandar Marngar.
Hadien ka yalang, Mosklandar deilang kiwa yahkhmat ka Jaiñtia Unit wa kynthup ya u Heibormi Pariat, u Kmen Myrchiang da pyntip ki wa ha kani ka yalang neiliang ki para dkhot waroh da rai ki da iwi i sur wow lai bait chakhmat yei yakhih hanla em kiwa pyntieñ pynsmiej, deiwa ong leh wa ki man ki kiwa khreh u chong patok neibhah sñiawthooh ki wa ki mih ki wow yakhun yei hok.
Kamtæ khut kyntu kyrsu ki ya waroh ki tre Truck, kiwa yah Truck wa ki paidbah wow wan e kyrchaanlang ki ha kani ka yakhih yong ki.
Discussion about this post