Ka yakhih paidbah wow phah hiar chuki ya u CEM ka GHADC u Rakesh A Sangma da pynchrai ko ya ki paidbah hadien wa ka sorkar wa yahkhmat da ka NPP ym bien ko wow leh iyi iyi heiwa da mih i maham pynyap ya u CEM ka GHADC wa ya u Montri Rangbah ka jylla, u Conrad Sangma.
Ya ini i maham da mih ha Facebook ynnin ka sngi deiwa em uwi u bru wa tip kam u Rakga Marak uwa da kam toh u President ka seiñ kieñ suloi wa thymme kawa tip kam ka United A’chik National Liberation Army Force (UANLA).
Uni u bru da maham u ya u Conrad K Sangma wa ya u Rakesh A Sangma wa lada ym ap ki yeiwa dawa ki jaitbru Garo daw maad ki da u kuli ka AK.
Da maham u leh ya Rakesh Sangma deiwa ong wa lada ym hiar chuki u, ym yoh de u wow im deiwa suk hapoh ri-loom Garo.
Neiliang ki pulit ka ri-loom Garo da ong ki wa ym em kam katæ ka seiñ UANLAF wei ym jooh sñiaw ya ka wei ini toh du i kaam yong kitu kiwa kwah wow pyntieñ wei pynkulmar paidbah wei wow chim kabu ya ini i yakhih ha ka GHADC.
Hanla kattæ leh, ki pulit ka Meghalaya da chimkhia ki ya ini i kaam wei da pynman ki ya ka takit yow chemdien ya kiwa leh ya ini.
