U MLA ka Tipra Motha Party (TMP) ka jylla Tripura, u Philip Kumar Reang ynnin da ujor FIR u pyrchah ya u heh ka BJP, u Pratik Dev Varma uwa da maham u oo hapoh MLA Hostel ha i miet ka 1 tarik.
U Pratik Dev Verma toh u khon u Lat (Governor) ka Telangana wa u Deputy CM ka Tripura, u Jishnu Dev Varma.
Ha ka ujor da ong wa heipor wa dang yaklam u Philip wa kiwa ha-yung u, le ngut ki bru da poi ki ha rana ka Quarter yong oo wei da ksoh ki oo heiwa manda kyrpaad u ya ki wow pynlait oo da sdang ki wow mai oo wei maham wow ah rdang oo.
Ha ka ujor ha Police Station ka Agartala, da ong u wa kini ki bru da maham ki leh wow wanrah 400 – 500 ngut kiwa kreh ka BJP wow tynyap oo wa kiwa ha-yung u.
Kini ki le ngut da mih ki na kamra ha MLA Hostel, wa em u Pramod Reang, uwa man u MLA ka BJP na Santirbazar Assembly Constituency.
U Philip da ong u leh wa da hap rieh ki ha yung u MLA Biswajit Kalai hadien wa jia ini iwa da pyntieñ ya ki.
Discussion about this post