Shillong: U Secretary yong ka Hima Nongspung, u Michael Warjri da pyntip u wa da chah maham u ha u Tapon Kalita uwa man kam u Contractor naka chnong Mirza yong ka jylla Assam neidaw wa pyrchah u wow chna ya ki ar tylli ki sarok na Assam cha Meghalaya kiwa haap hapoh yong ka Hima Nongspung ha Ri Bhoi District.
Hawa yaklam wa kiwa pathai khubor ynne ka sngi, u Warjri da pyntip u wa da e ya ka ujor cha u montri rangbah wa ka Deputy Commissioner yong ka Ri Bhoi District wei kamjooh cha u MLA yong ka Jirang u S. Sohtun ya ini i wan chna sarok yong ka sorkar Assam.
U Warjri da ong u wa kini ki ar tylli ki sarok, kawi ha Patagoan kawa chong dor T.14 klur wa kawi ha Mawding kawa chongdor T.13 klur, wei waroh ar tylli kini ki sarok toh ki wow lai na Assam cha Meghalaya, wei da pyntip u leh wa neiliang u MLA warim da thoh u cha ka sorkar Meghalaya ha ka 16 tarik Naichiphaw u snem wa dadep wow paanbor tangwa neiliang ka sorkar Meghalaya hadooh katni ym em e bor ko.
Da pyntip chooh chooh u wa neiliang yong u Tapon Kalita uwa pynkreh u ya kini ki ar tylli ki sarok da kreh u khlem yohbor namo wow ap ya ka hukum yong ka DC ka Ri Bhoi wa da e ha u bnai Wisu 19 tarik uni u snem wow pynsangeh chwa yei kreh.
“Toh hajrong ini i pyrchah, u Kalita da rahbor u ya u Atos Momin uwa man uwa chong chnong ka Balakhawa, wei da pynchitom u ya oo hadooh wa da mynsoo joor u,” da ong u Warjri.
Heiyatoh wa ini i jia waroh da pyntip u leh wa da dep ujor FIR ha ka Palasbari Police Station yong ka District Kamrup ka jylla Assam, hadien wa uni u Kalita da maham u wow rahbor sa ya oo uwa man kam u Secretary yong ka Hima Nongspung.
“Heiyatoh wa ini i chah maham da pyntip O leh cha u cha u Commissioner Secretary yong ka tnat kaam poh yung ka sorkar Meghalaya,” da pyntip u.
U Warjri da ong u wa ka sorkar Meghalaya hadooh katni dang suki ko kiaw næ, katwa neiliang yong ka jylla Assam dang pteiñ ko wow chna sarok wei ini da pynman ko leh ya oo wow pyrkhat wow e da ka mukotduma ha ka Meghalaya High Court.
Katkam wa pyntip u Warjri, ha ka 13 tarik uni u bnai neiliang yong ka jylla Assam kawa wan chna ya ka yingkieñ ha Ranibari da leh ko deiwa pynsih ya u sarok wa chna da ka sorkar Meghalaya ha i por wa dang man MLA u L. Mylliemngap, wei da pynrap u wa lada ka sorkar ym leh ko iyi iyi leh wow yada, neiliang yong oo kam u Secretary yong ka Hima ym yohsa u wow yada wei wow thooh luti katkam ka aiñ.
Discussion about this post