U Lt. Governor ka Delhi, u VK Saxena ynne da pynmih hukum u yow phah takit ya ka Scheme kular Election ka Aam Admi Party neibynta ka Election wa daw pynman ha u snem wow wan. U Saxena da phah hukum u cha ka u Delhi Chief Secretary wa u Commissioner of Police, hadien wa yoh ujor na u heh ka Congress, u Sandeep Dikshit.
Neiliang u heh ka AAP, u Arvind Kejriwal da ong u wa ini toh du i chah pynbaad thok deiwa ong chaphang iyi u takit ki.
I chah pynbaad toh wa ka APP da pynemkaam ko ya kani ka kular Election yow pynlum pynlang yei pyrtuid ki bru wei wow tip bniah chaphang yong ki deiwa wanrah ya ka Scheme wa tip kam ka Mahila Samman Yojana deiwa kular wow e Rs. 2,100 chi bnai cha ki kynthai.
U Saxena ha ka hukum da ong u wa hap wow takit yeini i pynbaad wa da chim ya ka ‘Personal Data’ ki bru deiwa khut ya ki wow thap pytuid hapoh kani ka Scheme kam kiwa yoh myntoi. Wei da phah leh ya ki Delhi Police wow pynchitom ya kitu kiwa pynman ya ki Registration Camp khlem da yoh bor.
U Kejriwal da ong u wa ini toh i pyrchang donhi wow pyndam ya kani ka Scheme neibhah wa tieñ ya rem Election ka BJP wei ka BJP leh kwah ko wow pyndooh noh ya ka e Scheme e mynkna ka puræ puthi deilang i bordiñ.
Neiliang ka Women and Child Development wa Health Department ka Delhi dadep ki wow pynbna paidbah wa ka Mahila Samman Yojana deilang ka Sanjeevani Yojana toh ki wym em yoh yei mynjur ka sorkar iwa mut kiwa ym em hi tang u em leh heiwa da kyntu ya ki paidbah wym toh u khana ki iyi iyi chaphang yong idæ heiyatoh wa kani ka Scheme.
U Kejriwal da pynche u deiwa ong, “Hadien wa jop ya ka Election daw e Rs 2,100 cha ki kynthai wa i sumaar wa dei mynkna cha kiwa em 60 snem chaneiñ i rta wei ini da pynkyrbeh ko ya ka BJP wei da em boon ki heh BJP kiwa ong ya nga wym em laad u jop, tangwa ka BJP du ka Deposit leh daw dooh ko ha kiwa boon ki thaw”.
“Nyngkong da phah ki da ki gunda, hadien won da ki pulit yow pynsangeh ya ki Registration Camp, ynne won da phah takit kawa chna thok. Iyi u takit ki? I kular donhi i wa manda jop Election yow pynkrehkaam ya kani ka Scheme,” da ong u Kejriwal.
Ha ka ujor u Dikshit, da kam leh wa wanrah poisa na Punjab cha Delhi neibynta ka Election heiwa u Saxena da phah u wow pait ya waroh ki kari wa wan cha Delhi na Punjab, Haryana wa Rajasthan.
Ka AAP da ong ko wa ini waroh toh du i pynemkaam bakla ka Bharatiya Janata Party (BJP) ya u Lt. Governor yow pynthut ya ka Election.
Ka AAP da kam ko leh wa da em palat 22 lak ngut ki kynthai kiwa da thap pyrtuid hapoh ka Mahila Samman Yojana.
Discussion about this post