Ynne ka sngi ki kattu katni ngut ki waheh kamjooh ki Executive Member ka Dorbar Chnong Tuber Kmaishnong da pynbaad ki wa u waheh chnong warim, u Micky Lyngdoh wa u Secretary warim, u Tellme True Phawa da pynemkaam bakla ki yei bor yong ki heiyatoh wa ki kaam poisa poilaiñ.
U Jiedlang Sana da pyntip paidbah u khamtam ya ki paidbah ka chnong wa ym em waheh chnong de katni ha Tuber Kmaishnong wei da chem chitom bha ki neibhah wa ka samoi krehkaam u waheh chnong warim, u Micky Lyngdoh da kut ko nadooh ka 30 tarik u Naisan 2025 wei ynne la ka 11 tarik Naiynru khlem em waheh chnong de.
Da ong u wa ki paidbah da chem chitom bha ki neibhah ym em de wa e ya ki kot ki sla wa emkaam ya ki paidbah wa chong chnong nadooh ki Residential wa Income Certificate wa kiwi kiwi kiwa emkaam, deiwa pynrap wa ha ka Executive Meeting wa man ha ka 27 wa 29 tarik u Naisan heipor 8:30 i step, da kylli katwon tylli ki Bank Account yong ka chnong heiwa da khana u Micky Lyngdoh wa em du kawi donhi wei manda thooh bniah ki dkhot ka EC da chem wa da thok u waheh chnong warim neibhah wa da wai sa kawi tawon ka Account khlem tip ki EC Member wa ka chnong.
U Heibormi Shylla won da pynche u wa heiyatoh wa ka Gas Pipeline ka Indradhanush Gas Grid Limited (IGGL) heiwa ha ka 27 tarik u Naisan, u Micky Lyngdoh da e Report u wa ka poisa wa da yoh man ko Rs. 24,14,500 tangwa manda kylli ya ki dkhot ka EC katkam ka bai thaw namo ka Land Compensation wa toh u yoh ka dorbar chnong da chem wa ka poisa wa da phah ka IGGL dapoi ko hadooh Rs. 1.35 klur.
Kamtæ da ong wa emkaam u leh ya ka Special Joint Inspection khnang wow che kiwa yoh bynta na ka Land Compensation nei siang ya ki Pipe Gas, wei da ong u wa hadien wa e dei thoh wow leh ya ka Special Joint Inspection, da chem wa em ki bru ki wym em thaw wei ki wym toh kiwa na Tuber Kmaishnong leh yoh poisa hi wei hajrong ini da thoh cha ki bor District wa ka IGGL khnang wow yoh yei hok ki bru wa em thaw wei wow che ki paidbah ka chnong.
U Salongmi Kyndait uwa man leh u dkhot ka Executive Committee ka chnong da ong u wa ym em u che ki Scheme wa yoh yarap ka chnong kam ka CMF kawa Rs. 26,97,000 wei kam ki EC ymjooh tip heiwon i thaw wei kammon pynkreh u waheh chnong wa u Secretary warim ya kani ka Scheme.
Chooh chooh da ong u wa heiyatoh wa ka PES nadooh u 2022 hadooh u 2024 da yoh hadooh Rs. 34,79,430 wei neiliang ka EC wa ka dorbar chnong ym che heiwon wei kammon pynkrehkaam ya ka, kamjooh ka yong ka IGGL leh ym che næ sñiawbiang khamtam ya ki tre thaw neibhah em ki bru ki wym em hok leh yoh myntoi hi ki na kani ka IGGL.
Neiliang u Polivingstone Sana da ong u wa hawa ap ya ka Report ha ka 27 wa ka 29 tarik u Naisan 2025 da pynsñiaw yei yoh wei dooh ka chnong wei da em ki dkhot kiwa da kylli katwon tylli ki Account em ka dorbar chnong heiwa u Micky Lyngdoh da khana u wa em ko du kawi ka Account ha Meghalaya Rural Bank ha Wapungskur heiwa da khana u wa ka poisa na ka IGGL em ko 24,14,500 wei ini da pyn artatien ko ya ki EC Member neibhah wa toh u yoh Rs. 1.35 klur, heijooh i por da thooh tre yeini heiwa da chem wa u waheh chnong warim da wai u sa ya kawi ka Account ha HDFC Bank, Khliehriat, heiwa ki dkhot ka EC ymtip ki wa da wai ya kani ka Account.
Da pyntip u wa hawa kylli ya kani ka Account da chem wa em ka poisa Rs. 52,33,030 wei kani ka poisa ha kani ka Account toh kawa dang krehkaam wei ka poisa wa mih wa psiah ym khana u waheh chnong warim ya ka EC wa ka chnong deiwa che wei hadooh katwon tylli ki Account em ka chnong wei hajrong ini daw thooh tre chooh chooh boi dang em ki Account ka chnong sa cha kiwi tawon ki Bank wei kammon da pynlai wei cheiwon da phah ka.
Discussion about this post