Ka Khasi Students Union (KSU) Barato Unit deiwa yohbor na ka chnong Barato kamjooh deiwa sñiawthooh lang wa ka VDP, da chimkti ko wow pait ya ka Wah Mynriang khamtam u yada na kiwa tynyap khiar ya ki doh um doh wah, ka seiñ da pyrchang ko u leh chiboon ki kaam wa bha nadooh ki snem wa dadep chadien khamtam u pynbha chooh chooh ya kani ka wah.
Ka seiñ ha i step ka 30 tarik hei emlang u waheh chong, waheh dong (c) wa kiwa kitkaam ka seiñ da chim bichaar ki ya u bru (wa ka seiñ ym kwah ko u khana pyrtuid) kamjooh ka chnong uwa da leh pyrchah ya ki kyndon wa da booh da maham heiwa uni u bru da phla u kamjooh da em ki sakhi sabut kiwa biang wa da leh pyrchah u da deiwa thang bomb, pynyang jaar, ha kiwa boon ki thwai ka Wah Mynriang heiwa da ngat u ya ka kuna wa ka seiñ da booh ko katkam i leh yong oo.
Ka seiñ neipor cheipor da pyntip pynsñiaw ko cha waroh deiwa booh leh ya ki dak ki chin wa biang ha lynter ka wah wym hoi u thang bom, bær dawai bih, diang jaar, bæh musari, u pynsngad, u khang ya ki liar ki chka wa kiwi ki rukom tynyap khiar ya ki doh um lait nei khwe.
Da khang leh wow pam ya ki dieñ ha lynter ka wah wei da khang leh ya kiwa na baar chnong wow wan sah miet cha kani ka wah khlem ki tre chnong, ka seiñ da maham joor ko leh ya ki bru kiwa rah ya ki khubor boonjait khlem ki sakhi wa biang.
Ka seiñ da ong ko leh wa ym e laad ko ya kiwon kiwon kiwa leh pyrchah ya ki aiñ wa da booh khnang yow man i kyrkhu ya ka pateiñ wa mynried.
