Jowai: Ka Dorbar Chnong Lumshnong ha i yatoh waka Notification kawa da pynmih lyngba ka Office yong u Member Secretary yong ka Meghalaya State Pollution Control Board (MSPCB) Shillong kawa da mih ha ka tarik 15-02-2019 neibynta ka M/S Star Cement wow pynheh ya i paar tih moochuni yong ka na ka 09 lakh Ton cha ka 25 lakh Ton chi snem deiwa pynman chwa da ka Public Hearing ynne ka sngi ka 19 tarik.
Neiliang ka Dorbar Chnong ka pynrem joor ko ya ini i leh embor wei wow yoohbeiñ ya ka hok manbru ka chnong wa ya ka riti shynchaar yong ka chnong ka thaw ya wa da pynkup bor da ka JHADC lyngba ka 6th Schedule ya ki Waheh Chnong wow pait ya ka chnong deiwa booh tarik pynman Public Hearing khlem yoh bor naka chnong.
Kamtæ ynne i step da ki spah ngut ki paidbah chong chnong ka chnong Lumshnong deilang wa ki khynnah skur da rah ki ya ki Banner wei da khang luti ya ki sahep ka MSPCB, Magistrate wa ki heh ka Star Cement wow pyrchah ya ka Public Hearing yong kani ka kharkhana pynmih khyndaw-bilat yow paan bor na ki paidbah wow pynheh ya ka paar tih moochuni na ka 9 lakh Ton chisngi cha ka 25 lakh Ton chisngi ha i thaw kawa heh hadooh 70 Hectar.
Kani ka pyrchah ki paidbah chong chnong kani ka chnong da kyrchaan da ka KSU Narpuh Circle wa ki paidbah na kylleiñ ka thaaiñ hadooh wa hap pyndam noh ya kani ka Public Hearing.
Neiliang ka Company ka da ong ko wa daw pait biang ya kani wa ka bor chnong.
Discussion about this post