Shillong: Ar ngut ki dkhar kiwa e jait Khasi da chah rai pynrem ki ha ka Registration Authority ka KHADC, hadien wa u General Secretary ka Hynñiewtrep Youth Council (HYC) u Robert June Kharjahrin da ujor u pyrchah ya ki, kawa da chimpor hadooh chi snem wow yoh ya ka rai.
Kini ki baar jylla kiwa e jait Khasi, toh u Varun S. Lyngdoh wa ka Sheena S. Lyngdoh kiwa toh ki khon yong u Shyam Singhania.
Hawa yaklam wa kiwa thoh khubor ynne ka sngi, u Kharjahrin da ong u wa kini ki bru da chim ki ya ka kur Khasi du neidaw wow yoh thied thaw, wow yoh u khayi pateiñ wow yoh ki ya ki kaam sorkar wei da pynjem daw ki ya ka jaitbru deiwa kam ki ya ka kur ka jait yow yoh myntoi samen ki.
“Kam wow e snieñ ya kini ki bru kiwa chim kabu, ka seiñ da thooh yutip ko lyngab ka RTI wow chem ya kini ki ar ngut, wei da chem toh kiwa sah ha Rock Cliff, Cleve Colony, Dhankheti”, da ong u Kharjahrin.
Da ong wa u papun yong ki toh u RB Lyngdoh wa ka beipun ki ka Pamela toh kiwa e jait Lyngdoh neibhah wym tip tre ki ya ka kur yong ki. Ka Pearl S Lyngdoh ka khon yong ki, da chong kha ko wa u Shyam Singhania wei da e kur ki dei yong Lyngdoh.
Neini i daw da yoh ki ya ka Scheduled Tribe (ST) na ka yungkrehkaam u DC tangwa ym yoh ki ya ka Khasi Tribe na ka KHADC.
“Yow yoh ya ka ST, toh u tip ki u klam Khasi wei wow bood ki ya rukom im u Khasi. Nga da ujor O cha u Registrar ka KHADC wa ki ym ye ki u man Khasi neibhah u klam Khasi leh ym tip ki” da ong u Robert.
“Hadien wa yakhun chi snem lynter, ka KHADC ha ka 3 tarik Wisu (March) 2017, da rai ko wa u Varun S Lyngdoh wa ka Sheena S Lyngdoh ym toh ki Khasi”, da ong u Kharjahrin.
Da ong chooh chooh u wa ka yungkrehkam u DC wa e ya ki Scheduled Tribe certificate ya ki toh u pyndooh noh ki ya ka wei haap su ki ya ka Income Tax ki katkam ka aiñ.
“Kani ka khubor man ko kawa che cha ka jaitbru, lada em kiwa chim kabu yow yoh myntoi toh u pyntip ki cha ka seiñ, yow leh ko yeiwa emkaam”, da ong u General Secretary ka HYC.
Discussion about this post