Kam chibynta wow lehkmen ya ka Hanuman Jayanti da em i thmu wow pynman yei lai paidbah da ka Shree Shree Hanuman Jayanti Utsav Samiti Shillong ynne ka sngi Good Friday ha Shillong wot hadien wa da mih chwa i pynkhreh ki paidbah hadien wa tip ki wa daw em kam ini.
Neiliang u DC ka East Khasi Hills da khang u wow e bor wow pynman ya kani ka lai paidbah hadien wa da yoh leh ya ka dorkhat wow pyrchah yeini kam na ka KHNAM deiwa pyrkhat leh yei ye u mih kulmar hadien wa i lai paidbah ka VHP ini wa dep da wanrah ko yei pyrchah kam na ka seiñ KSU.
Ka KHNAM ha ka dorkhat da ong ko wa kani ka Shree Shree Hanuman Jayanti Utsav Samiti da thmu ko wow pynman yei lai paidbah ha ka sngi Good Friday wa ha ka Easter Monday, kamtæ da dawa na u DC wym toh u e laad u leh yeini.
Kani ka seiñ da mut bait ko wow lai chakhmat ya kani ka lai paidbah heiwa da pynpoor ki ha ki Social Media wa u sdang ka lai paidbah nadooh 8:00 waje i step ynne ka 7 tarik heiwa u DC mar ya tip yeini da Phone u cha kini wow pyndam ki ya kani ka lai paidbah.
Kani ka Hanuman Jayanti toh kawa da lehkmen ha ka 6 tarik ha uni u bnai hapoh ka ri India tangwa ha Shillong da mut wow pynman ha ka 7 tarik.
Ki khynroo deiwa pyrkhat ya ini i thmu da em kiwa da pynkhreh wow yang ha Motphran, Mawprem wa ha Laban yow pynyoo yei pyrchah.
