Ka Board of Secondary Education, Assam ynne da pynbna ko wa da pyndam ya ka Exam neibynta ka General Science (C3) ka HSLC Examination-2023 kawa man leh ka Class-X Exam ha Assam kawa da toh u pynman ynne ka 13 tarik wei daw pynman noh ka ha ka 30 tarik uni u bnai.
Yeini da hap leh hadien wa da mih khubor wa em kiwa da yoh ya ka Model Question Paper wa thoh dei kti kawa da pynpoor ki paidbah ha ki Social Media.
Ka Board ym em pyntikna ko wa kini ki Model Question man ki leh kiwa da chna neibynta ka Exam tangwa neidaw wow lait nei kulmar wei wow khuslai ki khynnah da pyndam noh ko ya kani ka Exam wei da sdang wow takit yow tip yei daw wa da jia ini.
Ha iwi won i liang, ki khynnah ka JR Higher Secondary School wa em ha Cachar District kiwa da chah pynbaad wa da leh thok ki hawa thoh ya ka English Subject ha ka 3 tarik heiwa da pyndam ya kani ka Exam ha katai ka sngi yong waroh ki 760 ngut, da pynbna wa daw pynman biang ya kani ka Exam ha ka 28 tarik uni u bnai heipor 9:00 waje i step neibynta ka Subject English (C1).
Heipor wa thoh Exam kini ki khynnah da em kiwa yoh u riñ Video ya ki bru kiwa da psiah cha kani ka skur yow yarap ya kiwa thoh Exam na lait.
